Nga Blendi Gashi
Që nga zgjedhja e Hashim Thaçit në krye të Presidencës, përplasjet në partinë e dytë në Kosovë, Lidhjen Demokratike të Kosovës, nuk kanë të ndalur.
Partia e Ibrahim Rugovës ka hyrë në një qorrsokak të madh. Këtë e dëshmon edhe kërkesa e bërë së fundmi nga tre kryetarët e degëve të kësaj partie, Gazmend Muhaxheri i Pejës, Luan Gola i Gjakovës si dhe Fadil Gashi i Klinës, që të përjashtohen nga partia deputetët që nuk morrën pjesë në seancën e Kuvendit dhe nuk e pranuan t’ia bëjë kuorumin për president Hashim Thaçit.
Ky propozim ka ngjallur polemika të shumta jo vetëm nga disa kryetarë të degëve që kanë marrë pjesë në mbledhjen e fundit të Kryesisë ku është propozuar përjashtimi i deputetëve Vjosa Osmani, Anton Çuni, Adem Salihaj, Shpejtim Bulliqi e Hatim Baxhaku nga partia, por dhe nga disa prej deputetëve në fjalë.
Haxhi Avdyli i Prizrenit: S’besoj se do të ketë përjashtime
Kryetari i Degë së LDK-së në Prizren, Haxhi Avdyli edhe pse jo në mënyrë të prerë ka konfirmuar në një fare mënyre kërkesën që është bërë dje në Kryesinë e LDK-së për përjashtimin e pesë deputetëve “rebelë” që nuk ju bindën urdhërave të kreut Isa Mustafa për të votuar Thaçin president apo të paktën për qenë prezent në sallë.
“Diskutimet e tilla mbesin brenda forumeve nuk janë shumë me rëndësi kush çka kërku. Kërkesat e tilla nga individ të caktuar mendoj që nuk e çojnë partinë përpara dhe jam i bindur se Kryesia dhe as kryetari nuk do ta lejojnë një gjë të tillë sepse neve na duhet unifikimi dhe forcimi, pa marrë parasysh se individ të tillë kanë shpreh mendime të tilla. Nuk e besoj dhe nuk do të ketë përjashtime ndaj askusjt”, ka deklaruar Avdyli, për tesheshi.com.
Shpejtim Bulliqi: Sahanlëpirësit kërkuan përjashtimin tim nga partia!
Shpejtim Bulliqi, një prej deputetëve të cilit i është përmendur emri për përjashtim nga partia, i ka quajtur sahanlëpirës tre kreytarët e degëve të LDK-së që kanë bërë një kërkesë të tillë.
Ai u ka rikujtuar personave në fjalë se në karrierën e tij politike deri më sot, ka kaluar nëpër të gjitha nivelet organizative të LDK-së, që nga kryetari i aktivit, nëndegës, nënkryetari e anëtari i Kryesisë së degës, e deri te anëtari i këshillit të përgjithshëm të LDK-së fal përkrahjes se elektoratit tonë besnik.
“Nga kjo dua të ju bëjë me dije se veprimet e mia prej atëherë e deri me sot kanë qenë në përputhje me kërkesat e elektorati Rugovian të LDK-së, të cilët edhe një herë i bëjë më dije qe do ti qëndroj besnik fuqishëm deri në fund.
Por, po duket që veprimi im kësaj radhe ‘nuk paskan qenë’ në harmoni me disa prej interesave të këtyre sahanlëpirësve nomad të cilët me punën dhe angazhimin e vetë deri sot e kanë treguar shumë herë që e kane sakrifikua interesin e partisë për atë personal.
Do të ishtë mirë që të ndalët kjo gjuhe linçuese në komunikim me publikun dhe strukturat në të mire të LDK-së, të ulemi e të analizojmë punën dhe lëshimet e bëra deri më sot dhe të ecim në drejtim të konsolidimit të radhëve për tu përballur me sfidat të cilat do ta presin LDK-në”, ka deklaruar Bulliqi, për tesheshi.com.
Hatim Baxhaku: O Zot i madh, mëshiroji!
Një kundërpërgjigje drejtuar Gazmend Muhaxherit, Luan Golës dhe Fadil Gashit dhe atyre që mendojnë njëjtë si ata, ua ka dërguar edhe deputeti tjetër Hatim Baxhaku.
Ky i fundit i ka quajtur injorant dhe hipokrit tre zyrtarët e LDK-së që kanë kërkuar largimin e tij nga partia, derisa ua ka renditur postet që ka mbajtur në parti që kur është themeluar ajo.
“Në mbledhjen e kryetarëve të degeve të LDK- së me kryetarin z. Isa Mustafa, disa që kane ndërruar nga disa parti ose kanë ardhur dje në LDK, paskan kërkuar përjashtimin e Hatim Baxhakut nga LDK- ja sepse nuk e paskam përkrahur zgjedhjen e Hashim Thaçit për president.
Unë Hatim Baxhaku jam themelues i degës së LDK-së në Dragash, kryetar i nëndegës dhe anëtar i Kryesisë që nga themelimi.
Kam qenë delegat i Kuvendit Themelues të LDK -së në vitin 1989 të mbajtuar në Medresen në Prishtinë. Jam nënkryetar i parë i LDK-së dega në Prizren. Gjithashtu jam veteran i UÇK-së.
Dhe tani këta injorant dhe hipokrit po dashkan të më përjashtojnë nga partia e cila është dhe do të jetë e vetmja derisa të kam frymë.
O ZOT I MADH MËSHIROJ !!!”, ka shkruar Baxhaku në profilin e tij në Facebook.
Ai ka kërkuar të ndalet ky lloj i debatit dhe gjuha përçarëse dhe veprimin ndryshe për çështje te caktuara ta pranohet si vlerë dhe te ecimn përpara së bashku, siç ka thënë drejt fitoreve të reja të LDK-së për shtetin e Kosovës.
Portali tesheshi.com ka kontaktuar edhe me deputetin Adem Salihaj emri i të cilit poashtu është përmendur për përjashtim nga partia ka thënë se nuk dëshiron t’i komenton deklaratat e bëra pasi janë individuale.
Por, kryetari i Degës së LDK-së në Gjakovë, Luan Gola, i ka mohuar shkrimet e mediave duke thënë se në takimin e kryetarëve të degëve me kreun e partisë Isa Mustafa është debatuar për raportin me mediat në drejtim të krijimit të një opinioni më të fuqishëm publik dhe intensifikimin e punës në terren, në veçanti me të rinjët.
“Këtë po e them me qëllim të informimit të strukturave pas dezinformatave që posa i lexova në disa media elektronike. Kjo është edhe një dëshmi që disa media e kanë humbur arsyen dhe gjykimin! Në këtë rast publikimi i të pavërtetës ju mbetet objektiv kryesor që varet nga sponzoret e rastit që në kohën e sotit nuk janë të pakët”, ka reaguar Gola përmes një postimi në Facebook.
Mustafa: Fryma e LDK-së është shtetformuese
Kreu i LDK-s, Isa Mustafa, të martën në mëngjes ka thënë përmes një statusi në Facebook se fryma e LDK-së është shtetformuese dhe institucionaliste, por nuk ka sqaruar se nëse ia aludon këtë postim pesë deputetë që nuk përfillën urdhërat e tij.
“Fryma e Lidhjes Demokratike të Kosovës, që nga fillimi, është shtetformuese dhe institucionaliste. Nerëzit e LDK-së punojnë dhe do të punojnë për vlerat e LDK-së dhe shtetin e Kosovës”, shkruan Mustafa.
Ndryshe, që nga koalicioni me PDK-në por së fundmi edhe rehatimi i Thaçit në kollutkun që vite më parë ulej i ndjeri Rugova janë rritur në masë të madhe përçarcjet brenda LDK-së. /tesheshi.com/
