Presidenti francez Emmanuel Macron dje ka zbutur vërejtjet paralajmëruese që ai kishte bërë në lidhje me operacionin e Turqisë kundër militantëve kurdë në Siri, veriore pasi Ankaraja i quajti ato si fyerje.
Me 31 janar, Macron paralajmëroi Turqinë se operacioni në rajonin Afrin nuk duhet të jetë një justifikim për ta pushtuar Sirinë dhe tha se ai donte që Ankaraja të bashkërendonte veprimin e saj me aleatët.
Rreth dy javë më parë Turqia filloi sulmin ajror mbi milicinë kurde të YPG në Afrin. Sulmi i papritur në Sirinë veriore ka rritur tensionet në marrëdhëniet me Perëndimin, veçanërisht me Shtetet e Bashkuara, të cilat kanë mbështetur luftëtarët kurdë në luftën kundër Shtetit Islamik dhe ka trupat e veta në terren duke i mbështetur ata në pjesë të tjera të Sirisë.
Në një reagim të ashpër, Ministri i Jashtëm turk Mevlüt Çavuşoglu tha se: “Paralajmërimet të cilat vijnë nga një vend si Franca, lidhur me veprimet tona në terren, të cilat janë në përputhje me ligjet ndërkombëtare, ne i konsiderojmë fyerje për ne”.
“Ne po përdorim të drejtën tonë për vetëmbrojtje, kjo është në përputhje me vendimet e Këshillit të Sigurimit të OKB-së dhe jo një pushtim. Ata nuk duhet të tregohen dyfytyrësh”, tha ai.
Duke folur në Tunis, Macron i dha një ton më të butë vërejtjeve të tij të mëparshme.
“Vërejta se reagimi i ministrit të jashtëm turk ndoshta do të thotë se (operacioni) nuk është asgjë më shumë se sigurim i kufirit dhe se Turqia nuk ka ndërmend të shkojë më tej nga pozicionet që zë ai sot ose të qëndrojë në rajon në afat më të gjatë “, tha ai në një konferencë shtypi.
Franca, ashtu si Shtetet e Bashkuara, ka ndihmuar me armë dhe trajnim milicinë kurde të udhëhequr nga YPG në luftën kundër Shtetit Islamik në Siri. Kjo ka zemëruar Turqinë, e cila e konsideron YPG-në pjesë të Partisë së Punëtorëve të Kurdistanit (PKK).
PKK, e konsideruar një organizatë terroriste nga Turqia, Shtetet e Bashkuara dhe Bashkimi Evropian, ka bërë një kryengritje prej tre dekadash në juglindje të Turqisë.
/tesheshi.com/
