Nga Blendi Gashi
Malisheva, banorët e saj, janë ndjerë të fyer nga një koment i bërë prej kryeministrit Isa Mustafa, ku ka përmendur rriqrat, një insekt që kohë më parë që shkaktoi vdekjen e disa banorëve me anë të pickimit.
Por ky nuk është rasti i parë. Në vitin 2012, Hashim Thaçi, në pozitën e kryeministrit, u zbulua t’i kishte quajtur “zagarë” përkrahësit e Fatmir Limajt në Malishevë dhe kishte refuzuar të shkonte në një tubim partiak atje.
Kjo fyerje Thaçit i kushtoi me humbje të kësaj komune.
Ndërsa tani, Isa Mustafa i nervozuar me partinë opozitare AAK, e cila pas dështimit të Demarkacionit lëshoi një komunikatë ku tha se “kryeministri i jugosllavizuar, nuk pati guxim ta sjellë projektligjin pa miratimin e Vuçiqit”, bëri një kundërreagim të pafalshëm pasi deklaratën e partisë së Ramush Haradinajt, e krahasoi me rriqrat e Malishevës.
“A thu çka kanë Hashimi e Isa me Malishevën?
Ndaj deklaratës së kryeministrit ka reaguar ashpër deputeti i Lëvizjes Vetëvendosje, Rexhep Selimi, i cili ka thënë se Malisheva është një vend i luftës që pagoi shtrenjtë për lirinë e Kosovës, dhe se nuk është as vend i zagarëve e as i rriqrave.
“A thu çka kanë Hashimi e Isa me Malishevën? Nuk është Malisheva poligon i shfryrjes së ligësive të tyre! Malisheva nuk është vend as i ‘zagarëve’ e as i ‘rriqrave’ siç thonë ata, por vend i luftëtarëve dhe vend që e pagoi shtrenjtë lirinë me të cilën po abuzojnë këta pushtetarë”, ka shkruar në Facebook, deputeti Selimi.
Arban Abrashi mundohet ta arsyetojë Mustafën
Zëdhënësi i qeverisë së Kosovës, Arban Abrashi është munduar që të arsyetoj statusin e kryeministrit Isa Mustafa, i cili AAK-në i ka quajtur “rriqëra të Malishevës”.
“Janë disa të rinj që e kanë shkruar këtë status dhe Isa Mustafa nuk ka dorë në ‘këtë punë’. Është një ekip i të rinjve që merret me këtë punë. Nuk e ka shkruar Isa Mustafa”, ka deklaruar ai për mediat.
Por, pavarësisht këtij insistimi, statusi në fjalë nuk është shlyer nga Facebook-u i kryeministrit, ndërsa ky i fundit nuk është deklaruar, nuk ka kërkuar falje.
Qytetarët e bëjnë horr Mustafën: turp të përqeshësh me një fenomen që mori jetë njerëzish!
Me një deklaratë të tillë, Mustafa u hapi plagët familjeve nga komuna e Malishevës të cilët vite më parë kanë humbur më të dashurit e tyre nga pickimi i rriqrave.
Lidhur më këtë postim, kryeministri ka marrë shumë kritika nga miqtë e tij në Facebook, duke thënë se si mundet një kryeministër, një njeri që i thotë vetës akademik, të bëj deklarata të tilla, kur dihet se rriqrat në Malishevë kanë marrë shumë jetë njerëzish, andaj krahasimi i bërë nuk ka qenë i duhuri dhe kanë akuzuar Mustafën se asnjëherë nuk ka shprehur ngushëllime për këtë.
Portali tesheshi.com ka marrë disa komente të qytetarëve, kryesisht të banorëve të komunës së Malishevës, por jo vetëm, të cilët kanë reaguar ashpër postimit të bërë nga Isa Mustafa në Facebook. /tesheshi.com/
