Vrasja e një imami dhe e ndihmësit të tij në Queens të Nju Jorkut i ka trazuar muslimanët e asaj zone. Malama Akonjee dhe Thura Uddin sapo kishin lënë xhaminë kur u qëlluan nga pas në kokë. I pari do të vdiste në vendngjarje, kurse i dyti do ta humbiste jetën prej plagëve të rënda.
Nuk ka ende një motiv të përcaktuar për ngjarjen, por muslimanët në Queens deklarojnë të bindur se vrasjet ishin krim urrejtjeje. Ata fajësojnë kandidatin republikan për presidencën amerikane, Donald Trump, për nxitje të islamofobisë.
“Ne fajësojmë Donald Trump-in për këtë. Trump-i dhe drama e tij ka krijuar islamofobi,” thotë 33-vjeçari Khairul Islam.
“Duam drejtësi,” është thirrja e njerëzve të mbledhur për të protestuar jashtë xhamisë nga dolën imami dhe ndihmësi i tij pak para se të vriteshin.
“Nuk mendoj se është rastësi që janë dy zyrtarët kryesorë të xhamisë,” shprehet Mahfauza Hague, një mik i imamit.
Një drejtues i një xhamie tjetër në zonë, Kobir Chowdhury, thotë në një konferencë shtypi: “Ky është një krim urrejtjeje. Ne jemi paqedashës.”
“Ne duhet t’i shkojmë në fund kësaj. Duhet të mësojmë nëse e bënë këtë për shkak të fesë sonë,” ka kërkuar ai.
Imami i vrarë do të përshkruhej si një njeri i butë, që “nuk mund t’i bënte dëm asnjë mize”.
“Ai ishte model si imam, si baba, si një anëtar i bashkësisë,” tregon Chowdhury.
Një burim policor do të bënte me dije se në atë xhami nuk kishte patur probleme për vite të tëra.
Që prej nisjes së fushatës së Donald Trump-it për të siguruar kandidaturën për në zgjedhjet presidenciale, atmosfera e përgjithshme në vend është trazuar nga deklaratat e tij të forta, siç qe ajo për ndalimin e plotë të muslimanëve që të hynin në SHBA. Krimet me frymë antimuslimane u trefishuan kur Trump propozoi mbylljen e xhamive pas sulmeve terroriste të Parisit dhe vrasjeve në San Bernardino. Pothuajse gjysma e sulmeve, sipas The Independent, kanë patur në shenjë xhamitë. /tesheshi.com/
