Vrasja e gjytares Fildeze Hafizi është shoqëruar me dhjetra reagime të politikës. Kryetari i PD-së, Lulzim Basha, shprehet se shteti dhe të gjithë ne e braktisëm Fildezen në fatin e saj tragjik. “Ajo u lut e tmerruar për ndihmë dhe shpresoi, por u shpërfill nga një shtet dhe shoqëri e cila ka humbur forcën për të reaguar ndaj krimit dhe të keqes. Jeta e humbur e Fildeze Hafizit është një tragjedi që nuk duhej të kishte ndodhur, por edhe një shuplakë zgjimi për të gjithë, për të reaguar kundër krimit. Në një shtet që amniston kriminelët dhe nuk mbron as njerëzit e drejtësisë, jeta e çdokujt është e pambrojtur. Ne duhet të gjejmë forcën që të paktën fëmijet e Fildezes dhe të gjithë shqiptarëve të kenë një jetë më të sigurt”, thekson Basha në reagimin e tij.
Deputeti Eduard Halimi, ish-ministër i Drejtësisë në qeverinë e PD-së, shkruan se vrasja e një gjykatëse me urdhër mbrojtje, siç raportojnë mediat, përvecse tronditëse kërkon analizë për ekzekutorët e urdhrit të mbrojtjes por padyshim ndërshkimin më të ashpër ndaj ekzekutorit të Fildez Hafizit.
“Krime të tilla makabre kërkojne ndërshkim të ashpër ndaj kemi pasur të drejtë kur ndryshuam Kodin Penal 5 vjet më parë duke vendosur denime maksimale për këta monstra vrasësish. Ngushëllimet më të thella për familjen, fëmijët dhe të afërmit”, shprehet Halimi.
Një tjetër ish-ministër drejtësie, Ylli Manjani, ka reaguar.ashpër, ndërsa thekson “na rrofshin edhe ligjet, gjykatat, policët, NGO, ministritë, deputetët, prokurorët, SPAK-erat e pesticide të tjera si këto! Nuk i duhen askujt!”
“E humbi jetën pas një dhune permanente. Policia e Shtetit duhet ta dijë mirë këtë rast! Nuk ka më fjalë për këtë akt barbar! Një provë tjetër e luftës ndërmjet Qytetarisë dhe Barbarisë! Qytetaria sot u godit rëndë! Sistemi ligjor e shtetëror ende i trajton barbarët si qytetarë të barabartë! Kulmi i dështimit! Shteti që nuk mbron qytetarinë është i rrezikshëm!”, shkruan Manjani.
Ish- deputetja e Partisë Demokratike, Majlinda Bregu reagoi në lidhje me krimin e ndodhur sot në Tiranë, aty ku ish-bashkëshorti i mori jetën gjyqtares së Shkodrës Fildes Hafizi. Bregu i bën thirrje ministres së re të Drejtësisë që të fillojë vettingun nga vendimet për krimet në familje.Ajo gjithashtu propozon që t’i hiqet e drejta e përfitimit të dënimit çdo lloj dhunuesi grash e fëmijësh! /tesheshi.com/
