Shpallja e sotme nga Lulzim Basha se “marrëveshja e 18 Majit me Edi Ramën ka vdekur”, është dhe zhvillimi kryesor politik i ditës përpos debatit dhe votimit për “Rama 2”, e cila gjithsesi nuk ka problem numrash në Kuvend.
Kreu i opozitës shqiptare, deklaroi literalisht se pakti parazgjedhor me të gjitha pikat e tij nuk ekziston më.
Lulzim Basha e grisi atë marrëveshje në mënyrë publike, duke e cilësuar si një relike të vjetër, a thua se e kishte firmosur dikush tjetër dhe jo personi që e deklamonte atë.
Por, cili ishte mesazhi i Lulzim Bashës në fjalimin e tij, që ka tërhequr edhe vëmendjen e ambasadorit amerikan në Tiranë, Donald Lu, i cili drekoi me kreun e PD-së.
Mesazhi i Bashës ishte i qartë: marrveshja e 18 majit ka vdekur, nuk njoh asnjë pikë të saj, dhe jam gati për një marrëveshje të re, me kushte të reja, ndryshe do të ketë kryengritje!
Po ç’përmban marrëveshja e re? Në një farë mënyrë, ose thënë qartë, atë që përmbante “e vjetra” që vrau kreu i PD. Pra reformë Kushtetuese, Zgjedhore dhe ajo që është më e rëndësishmja Administrative.
Burime pranë mazhorancës, i bënë të ditur tesheshi.com se mesazhi është përçuar si një ftesë e Lulzim Bashës për një pakt të ri me Edi Ramën, pra për një vazhdim të 18 majit me një format të ri.
Një format, që Lulzim Basha kërkon ta shesë brenda partisë së plagosur Demokratike si një paketë e re me kushte ndaj qeverisë.
Siç mësohet ajo që është më e rëndësishmja nga kushtet që PD-ja pritet t’i vendosë qeverisë, ose më mirë mazhorancës në këmbim të luajalitetit për të miratuar së bashku reformat e mëdha, është rishikimi i Ndarjes Administrative dhe Territoriale.
Partia Demokratike kërkon të hyjë në zgjedhjet lokale të vitit 2019 me një ndarje të ndryshuar, ku të ketë më shumë qendra administrative, pra bashki në veri të vendit, dhe më pak në jug.
Siç mësohet, PD-ja do të kërkojë që Lezhën dhe Shëngjinin ta ndajë sërish në dy bashki, Shkodrën dhe Dukagjinin, si dhe nënshkodrën në bashki të veçanta, por ajo që është më dramatikja në këtë mesele, është se ka gjasa që të vihet dorë edhe mbi Himarën.
Pra që të kthehet ndarja administrative ku t’i hiqet Himarës pjesa e Labërisë. Në këtë aspekt Athina po bën presion të madh, duke vendosur edhe kushtin e vetos për negociatat me BE-së.
Vetë takimi i ambasadorit amerikan Donald Lu, me ambasadoren greke në Tiranë, gjatë seancave të Kuvendit në mënyrë demonstrative, ishte një sinjal për një mundësi të tillë.
Ndërkaq, edhe Rama këtë herë nuk ishte aq i ashpër me Athinën si herët e tjera.
Lulzim Basha, siç e kemi shkruar më herët, pritet të jetë protagonist i reformës kushtetuese dhe zgjedhore, ku sipas parashikimeve do të drejtojë ai vetë Komisionin e Posaçëm Parlamentar.
Dhe duke marrë rolin e protagonistit, pra prodhuesit të reformës de fakto, ai do të negocojë edhe për Himarën, e cila po kërkohet me ngulm nga Athina.
Një tjetër kërkesë e PD-së për reformën territoriale është që edhe Paskuqani të jetë bashki në vete, duke i bashkëngjitur Valiasin, i cili aktualisht është në bashkinë e madhe të kryeqytetit.
Tiranës, pritet që të kërkohet edhe shkëputja e periferisë pra që Farka bashkë me ish-komunat e pjesës Lindore të grumbullohen në një bashki më vete, sikur edhe Kashari, të cilit mund t’i bashangjitet pjesë të Domjes apo Laknasit që sot janë pjesë e bashkisë Vorë.
Me këtë ndarje, PD-ja shpreson të faktorizohet duke fituar më shumë asete elektorale që mund ta ringjallin atë politikisht, duke mos e lënë në kushtet aktuale ku PD mendon se është e destinuar të humbasë.
Nuk dihet nëse do të pranohen të gjitha nga Edi Rama, por ka gjasa që një pjesë e madhe të këtyre kushteve të pranohen edhe si pjesë e vullnetit politik të shprehur nga Kryeministri për marrëveshje institucionale.
Lulzim Basha, do ta përdorë rolin e tij si inspirues i reformës si një atu politik, për tu ringritur si brenda PD-së, por edhe në elektorat.
Përmendja e termit “kryengritje”, kreu i opozitës synon ta mbajë si një “shpatë Demokleu” që të rrijë si një kërcënim për Edi Ramën se ai kurdoherë mund ta hapë çadrën e famshme, që mazhorancës së vetme të Ramës, mund t’i shkatërrojë imazhin duke rrezikuar izolimin politik.
Dhe këtu Basha nuk ka gjë për të humbur, ç’pati, i humbi më 25 qershor.
Është Edi Rama, ai që rrezikon të prishë një fitore që e kishte kërkuar prej kohësh. Ndaj sipas të gjitha gjasave ai do ta hapë krahun lirisht për atë që e quajti hapur në Kuvend: “konkurrent, e jo kundërshtar”. /tesheshi.com/
