Europa nuk mund “të mbështetet tërësish” edhe më tej, tek Shtetet e Bashkuara dhe Britania e Madhe, pas zgjedhjes së presidentit Trump dhe Brexit. Komenti vjen nga kancelarja gjermane, Angela Merkel, e cila shtoi se dëshiron marrëdhënie miqësore me të dyja vendet, sikundër edhe me Rusinë, mirëpo Europa tashmë duhet “të luftojë për fatin e vet”.
Vërejtjet e kancelares Merkel vijnë pas dështimit të samitit të G7 për t’u angazhuar për zbatimin e marrëveshjes së Parisit të vitit 2015 për klimën, bisedime që Merkel më herët i cilësoi si “shumë të vështira”.
Presidenti Trump deklaroi se do të marrë një vendim për këtë problem në javët e ardhshme.
“Kohët në të cilat ne vareshim tërësisht nga të tjerët janë në largim. Unë e kam përjetuar këtë në pak ditët e fundit”, tha Merkel përpara një turme në një tubim elektoral në Mynih, në jug të Gjermanisë.
Korrespondentët thonë se komentet e Merkel janë një shenjë e qartë e mungesës së qetësisë brenda Bashkimit Europian. Marrëdhëniet midis Berlinit dhe presidentit të ri të Francës, Emmanuel Macron, sipas Merkelit, duhet të jenë prioritet. /tesheshi.com/
