Ashtu siç presidenti Thaçi, edhe kryeministri Haradinaj e ka lëshuar paksa gjuhën ndaj Brukselit. Dhe këtë e ka bërë duke qenë në Uashington, prezent në “Mëngjesin e Lutjeve”, duke u ftuar më pas të flasë në VOA.
“…janë detyrat e shtëpisë të Kosovës, një pjesë e të cilave ne i kemi marrë seriozisht; por për fat të keq edhe Bashkimi Evropian detyrat e veta të shtëpisë nuk po arrin t’i kryejë me Kosovën, për shkak të ndarjes që ka ndodhur brenda BE-së; sikurse e dijmë janë pesë vende jo njohëse dhe vetvetiu, Bashkimi Evropian si union politik e ka të vështirë marrjen e vendimeve të drejtpërta për avancimin e Kosovës drejt statusit të kandidatit dhe drejt anëtarësimit”, tha Haradinaj teksa u pyet mbi raportin e fundit të BE-së mbi strategjin e integrimit të Ballkanit Perëndimor.
Haradinaj sërish nuk ka lëshuar pe për çështjen e Demarkacionit me Malin e Zi, duke kërkuar korigjimin e vijës kufitare të përcaktuar.
“Mendoj se në nisje të kësaj marrëveshjeje ka ndodhur gabimi por këto mund të korrigjohen në këtë process dhe jemi me shpresë që mund të korrigjohet, pra jemi me shpresë”.
E nga ana tjetër, ka larguar nga vetja pëtrgjegjësinë për inisiativën e zhbërjes së Speciales.
“…iniciativa e deputetëve është kushtetuese, ajo ka ardhur në parlament, (një institucion) që ne si qeveri e respektojmë; pra, jemi të obliguar të sillemi me respekt. Nuk ka ndodhur një epilog për atë që tashmë ishte nisur, prandaj nuk do të mund të bëjë ndryshime për këtë temë”, tha Haradinaj. /tesheshi.com/
