Pas përfundimi të takimit mes Kryeministrit Edi Rama dhe kreut të Parlamentit, Ilir Meta, ky i fundit, në një deklaratë për mediat, bëri thirrje ekspertëve të opozitës, të mos bojkotojnë këtë punë të rëndësishme, pasi siç tha ai koha nuk pret dhe ata duhet të përfshihen deri në fund dhe më tej çdo çështje të diskutohet në komisionin për reformën në drejtësi.
“U kërkoj të rikthehen në tryezën e ekspertëve vendas dhe ndërkombëtarë, të mos vetëpërjashtohen, të ruajmë këtë frymë bashkëpunimi”,- tha Meta.
Ai nuk e përjashtoi mundësinë se mund të shkohet drejt një tryeze politike, kërkesë kjo e demokratëve dhe vetë ministrit të Drejtësisë Ylli Manjani.
“Të shkojmë drejt komisioni parlamentar të posaçëm për këtë reformë. Grupi i ekspertëve vendas dhe ndërkombëtarë, duhet të përfundojnë draftin e rishikuar mbi rekomandimet e Venecias”,- ishin fjalët e kreut të Kuvendit.
Meta deklaroi më tej se do të bëjnë çdo përpjekje për konsensus dhe konsensusi arrihet duke u ulur bashkë dhe jo duke u ngritur nga tavolina./tesheshi.com/
