Nuk kaluan as 12 orë nga takimi mes Edi Ramës dhe Ilir Metës, në një nga zyrat e selisë së Kuvendit dhe qarqet pranë kreut të LSI-së kanë nisur një “bombardim masiv” kundër kryeministrit, ambasadorit amerikan dhe diversionit në PS.
Pas një testimi të opinionit duke joshur katër nga “senatorët” e pakënaqur socialistë: Arta Dade, Anastas Angjeli, Fatmir Xhafa dhe Bashkim Fino, se mund të bëhen ministra pas largimit të Damian Gjiknurit, Ilir Beqajt e ca të tjerëve që nuk përmenden, dita e djeshme ka shënuar një sulm frontal të kolumnave të shkruara prej njerëzve të LSI-së që fajësonin Edi Ramën që po e çon vendin në zgjedhje të parakohshme.
“News 24”, që njihet për afërsinë me Metën përsëriti lajmin e “Koha Jonë” të Nikollë Lesit për ndryshime në qeveri, por lajmi nuk pati as jehonë as peshë. Qarqe në Tiranë shtuan zërat se ndryshimet në qeveri do të ndodhin këtë fundjavë, madje përmendën edhe tërheqjen e Ylli Manjanit, siç e ka bërë të ditur edhe tesheshi.com.
Por Artur Zheji, “artileria e rëndë” e Ilir Metës përsëriste pa ndonjë argument shtesë që vendi është pranë zgjedhjeve të parakohshme.
Poli Hoxha, ish-kryeredaktori i “Integrimit”-organit të LSI-së, që aktualisht drejton “Standard”-tani pranë Metës, botoi në një media shumë pranë PD-së një shkrim, ku akuzon Edi Ramën se synon të çojë vendin në zgjedhje të parakohshme, duke u munduar t’i verë fajin PD-së për dështimin e reformës për drejtësi.
Gazeta “Sot”, që njihet për lidhjet e forta me Ilir Metën dhe Anastas Angjelin, e bën fakt të kryer se LSI-ja nuk do ta votojë reformën në drejtësi.
Kurse këshilltari i Ilir Metës, Dritan Kaba, sulmonte frontalisht ambasadoren e Bashkimit Europian, Romana Vlahutin.
Andri Bejtja, një nga gazetarët më të njohur në vend, për të cilin Erjon Braçe ka shkruar se komentet e tij bëhen pas konsultimeve me Petrit Vasilin, sulmonte hapur ambasadorin amerikan në Tiranë Donald Lu, duke i theksuar se SHBA po i trajton shqiptarët më pak se një muxhahidin.
Kurse “Koha Jonë” e Lesit, që prej disa muajsh është në linjë me Ilir Metën, akuzoi Edi Ramën se ka braktisur fare Koço Kokëdhimën, madje nuk e mbledh as kryesinë e PS-së, se nuk dëshiron të shikojë me sy mikun e vjetër.
Me një fjalë shumë tituj dhe një kakofoni sulmesh që dukshëm janë presion pas takimit Rama-Meta.
Një presion që tregon qartë se biseda mes të mëdhenjve të koalicionit qeverisës jo vetëm nuk ka funksionuar, por as presioni i mundshëm i Metës në takim nuk ka ngjitur.
Po atëherë ç’do të ndodhë?!
Furia e sulmeve të tilla duke qëlluar me çdo plumb dhe gjithandej, tregon se as vetë Ilir Meta nuk di se ç’po gatuan Edi Rama. Ndoshta për herë të parë, mjeshtri i LSI-së nuk e deshifron dot rivalin që e ka detyruar të tërhiqet më shumë se një herë…/tesheshi.com/
