Kreu i partisë Demokratike, Lulzim Basha zhvilloi në zyrën e tij një takim me ambasadorin amerikan, Donald Lu me të cilin duket se kanë biseduar për nismat më të fundit të demokratëve.
Basha, i pyetur nga gazetarët nuk ka dhënë detaje për bisedën, por është shprehur i vendosur për të bërë përpara me nismën për dekriminalizimin dhe hetimin ndërkombëtar të skandalit të CEZ.
“Kryetari i LSI-së, që është kryetari i Parlamentit, ka shprehur gatishmërinë për të votuar hetimin ndërkombëtar dhe ky është momenti që nga shprehja të kalojë në vepra”, tha Basha, duke ia adresuar këtë apel edhe partisë Socialiste.
“Edhe Rama me siguri do të ketë interes të zbardhet pjesa e tij në ndarjen e 500 milionë eurove, po të heqim 135 të DIA-s, ku akuzat janë për ortakun e tij. Të votojmë ligjin dhe t’i hapim dritën jeshile pranisë së prokurorëve ndërkombëtarë”, tha Basha.
Ai shtoi se është koha për veprime konkrete, e kjo nis nga Meta I cili duhet të mbledhë konferencën e Kryetarëve dhe të enjten të kalojë në seancë plenare propozimin për hetim ndërkombëtar.
Përqëndrimin e akuzave të opozitës për skandalin e CEZ në drejtim të Metës, Lulzim Basha e shpjegoi se akuzat janë për të dy krerët e mazhorancës. Por, tha ai, vjedhja e 500 milionë eurove nga qeveria Rama, për marrëveshjen me CEZ mbeten në rrafshin e akuzave e duhet t’i nënshtrohen një ekspertize të plotë juridike. Ndërsa, sipas Bashës, në rastin e Metës akuzat janë publikuar në dokumente zyrtare dhe media ndërkombëtare. /tesheshi.com/
