Kryeministri Edi Rama e ka cilësuar reformën në drejtësi si një reformë historike, e cila nuk është vetëm në interes të Shqipërisë, por edhe të Bashkimit Europian.
Në përfundim të takimit të grupit parlamentar të Partisë Socialiste me ambasadorët Lu e Vlahutin, Rama doli në një deklaratë për media nga selia rozë. Ai shprehu gatishmërinë e deputetëve socialistë për miratimin e reformës.
“Kjo është një reformë historike e Shqipërisë dhe është në interes jo vetëm të Shqipërisë, por edhe të BE e miqve tanë në Europë, të cilët duan të hapin negociatat me Shqipërinë. Fjalimi i presidentit të Amerikës, Barack Obama në Londër ishte shumë i qartë. Pjesë e planeve të BE është edhe zgjerimi i saj, ose siç do të thoja unë, plotësimi i saj me shtete si Shqipëria”, – tha Rama.
Duke folur edhe një herë për reformën në drejtësi ai u shpreh se Partia Demokratike ka të gjitha mundësitë për të diskutuar për këtë reformë. “Nuk besoj se në çdo gjë që ata ngrenë shqetësime e kanë gabim, por besoj se duhet të korrigjojnë qëndrimin. Duhet të qëndrojnë në tavolinë, të jenë të vendosur për reformën”, – ishin fjalët e kreut të Partisë Socialiste. /tesheshi.com/
