Ka zgjatur 60 min mbledhja e grupit parlamentar të Partisë Socialiste ku të pranishëm ishin edhe dy ambasadorët, ai i Shteteve të Bashkuara të Amerikës, Donald Lu e ajo e Bashkimit Europian, Romana Vlahutin.
Burime brenda selisë rozë kanë bërë me dije për tesheshi.com se në fillim të mbledhjes e ka marrë fjalën kreu i grupit parlamentar, Gramoz Ruçi, i cili ka shprehur vullnetin e mazhorancës për miratimin e reformës në drejtësi.
Më tej, ambasadori Lu u ka kërkuar deputetëve të Partisë Socialiste ta miratojnë reformën për shqiptarët dhe politikën në vend, jo vetëm për të nisur negociatat për anëtarësimin në BE.
Në përfundim të takimit, vetë ambasadori Lu u shpreh se është e pazakontë që ambasadorët të marrin pjesë në mbledhjen e grupeve parlamentare.
“Jemi në një udhëkryq të pazakontë për reformën në drejtësi. Prania ime këtu tregon rëndësinë që Shtetet e Bashkuara të Amerikës i kushtojnë kësaj reforme”, – tha Lu.
Nga ana e saj ambasadorja Vlahutin u shpreh se ndodhej në selinë e PS-së për të ndihmuar Shqipërinë që të arrijë standardet për në Bashkimin Europian dhe të mund të çelen negociatat.
“Jemi të angazhuar në një dialog si miq dhe partnerë. E drejta sovrane e deputetëve që të votojnë në parlament është një e drejtë që ua kanë dhënë zgjedhësit shqiptarë dhe kjo është një gjë që ne e respektojmë plotësisht e nuk do të ndërhynim kurrë, por siç e thashë, është shumë e rëndësishme që të përfshihemi në një dialog si aleatë dhe të shpjegojmë këtë në kontekstin e vet”, – deklaroi ambasadorja e Bashkimit Europian në Shqipëri. /tesheshi.com/
