Vrasja e gjashtë personave dhe plagosja e shumë të tjerëve pas një sulmi terrorist në një xhami në Kebek të Kanadasë ka krijuar shqetësim e ankth te besimtarët muslimanë në Holandë, ku fryma islamofobike është e ndjeshme.
Në katër prej xhamive më të mëdha në Holandë është marrë një masë ekstreme pas këtij sulmi, ajo e mbajtjes mbyllur të dyerve gjatë faljes së namazit.
“Ndjehemi të shtrënguar t’i mbyllim dyert e xhamisë gjatë namazeve,” bënte të ditur një njoftim i katër objekteve fetare, Xhamisë Blu në Amsterdam, Xhamisë es-Sunnet në Hagë, Xhamisë Esselam në Roterdam dhe Xhamisë Omer el-Faruk në Utreht.
Edhe pse xhamitë janë ambiente të hapura, ku mund të hyhet lirisht, për shkak të shqetësimit për sigurinë e besimtarëve që gjenden në to, është parë e udhës që dyert e tyre të mbyllen gjatë kohës së faljes.
“Aktet e pamëshirshme, si, në Kebek, ndihmojnë në rritjen e islamofobisë anembanë botës. Xhamia është një ndërtesë e hapur, ku çdokush duhet të jetë në gjendje të hyjë në çdo kohë të ditës për të gjetur paqe. Prandaj na vjen keq që duhet ta marrim këtë masë të rreptë sigurie,” shtonte njoftimi i xhamive. /tesheshi.com/
