Gazetari Parim Olluri, ka reaguar pas sulmit fizik që pësoi mbrëmjen e djeshme, ndërsa po shkonte në banesë së bashku me të fejuarën.
Ai tha se sulme të tilla i bëjnë gazetarët edhe më të fortë, duke shtuar se do të vazhdojë të merret me raportime të korrupsionit.
“Të korruptuarit duhet të kenë frikë nga gazetarët dhe jo anasjelltas”, tha gazetari.
Reagimi i plotë i Parim Ollurit
Ju faleminderit për mbështetjen tuaj. Kjo dëshmon se jemi shumë në numër pro lirisë së shprehjes dhe publikimit të aferave kriminale të pushtetarëve e biznesmenëve të fuqishëm.
Unë jam mirë me shëndet. Nuk kam lëndime të rënda. Genta e ka marrë veten nga tronditja prej sulmit të mbrëmshëm. Sulmuesit nuk i njoh, por policia është duke u marrë me rastin.
Shpresoj që do t’i zbulojnë edhe urdhërdhënësit e tyre. Ne gazetarëve këto sulme pas shpinës na bëjnë edhe më të fortë. Na tregojnë sa njerëz të ligj janë ata për të cilët raportojmë. Nëse kanë menduar se Insajderi do të ndalet së publikuari aferat mafioze të tyre, janë gabuar rëndë.
Ata duhet të kenë frikë nga ne gazetaret, e jo ne të frikësohemi nga të korruptuarit. Unë dhe kolegët e mi në “Insajder” do të vazhdojmë të jemi të ashpër në luftën ndaj së keqes, sekserëve, komandantëve të korruptuar të UÇK-së dhe të gjithë hajdutëve të tjerë, të formave të ndryshme. /tesheshi.com/
