Sulmi me vezë në parlament, duket se nuk do të jetë i fundit ndaj kryeministrit të Kosovës, Isa Mustafa, por kësaj radhe nuk dihet nëse autorët kanë qenë anëtarë të opozitës. Policia e Kosovës ka mundur të parandalojë që disa persona të shpojnë gomat e makinës së Mustafës.
Bëhet e ditur se policia që shoqëron eskortën e kryeministrit Mustafa mundi të ndalojë disa persona që planifikonin të sulmonin makinën e tij, duke hedhur sende të mprehta për të shpuar gomat e makinës.
Si njofton Kosovapress, policia ka kërkuar të kontrollojë të dyshuarit për të parë se çfarë kishin në në çantat e tyre, por ata i kanë lënë çantat në tokë dhe janë larguar.
Sipas policisë, personat në fjalë planifikonin të hidhnin sende të forta për të shpuar gomat e makinës së kryeministrit Mustafa.
Ky i fundit një ditë më parë u qëllua me vezë në parlament nga deputetë të opozitës, në shenjë proteste ndaj raportimit të vonuar për marrëveshjet e Brukselit në Kuvend. Opozita e bashkuar ka hartuar një axhendë veprimesh dhe protestash për të kundërshtuar marrëveshjen për themelimin e asocacionit të komunave serbe dhe demarkacionin me Malin e Zi. /tesheshi.com/
