Diplomatët grekë kanë ndjekur me shqetësim zhvillimet e fundit në Ballkan, pasi Serbia tërhoqi gjithë stafin nga ambasada e saj në Shkup.
Kështu shkruan gazeta greke Kathimerini në edicionin online.
Kathimerini njofton se Beogradi tërhoqi personelin nga ambasada, pasi akuzoi Maqedoninë për “veprimtari ofensive” kundër Serbisë.
Faqja greke deklaron se Beogradi duket i zemëruar, sepse Shkupi po avancon marrëdhëniet me Prishtinën.
Kathimerini vëren se mosmarrëveshja erdhi në një kohë kur Maqedonia është duke bërë përpjekje për të riaktivizuar kandidaturën e saj në përpjekje për t’iu bashkuar BE-së dhe NATO-s, pas një periudhe që shënoi trazira politike.
Gazeta greke kujton se kryeministri i Maqedonisë, Zoran Zaev formoi një qeveri koalicioni në qershor, gati gjashtë muaj pas zgjedhjeve në atë vend.
Gazeta shkruan po ashtu se Greqia këmbëngul që mosmarrëveshja me Maqedoninë mbi emrin e vendit të arrihet para se këto vende t’i bashkohen aleancave ndërkombëtare.
Qeveria maqedonase njoftoi më parë se kur të vendoset për anëtarësimin e Kosovës në UNESCO, do të merren parasysh pikëpamjet e shumicës së vendeve të BE-së, edhe pse vetëm tre e gjysmë muaj më parë Zaev pati thënë se Shkupi do të jetë neutral me rastin e votimit.
Qeveria Zaev, megjithatë, tha se “po zhvillon marrëdhënie miqësore me të gjitha vendet fqinje”, dhe se, në rast të ndonjë çështje të hapur “do të udhëheqë politikën e bashkëpunimit ndërfqinjësor dhe rajonal”, por edhe se, sa i përket votimit për anëtarësimin e Kosovës në UNESCO “do të marrë parasysh pikëpamjet e shumicës së vendeve të Bashkimit Evropian”.
Më herët, agjencia maqedonase Makfax njoftoi se qeveria e Maqedonisë ka përgatitur një propozim për të mbështetur anëtarësimin e Kosovës në UNESCO dhe ka vlerësuar se kjo është një arsye pse Ministria e Punëve të Jashtme të Serbisë ka tërhequr stafin e ambasadës në Shkup në konsultime urgjente në Beograd.
Agjensia maqedonase, duke cituar burime anonime, ka thënë se Beogradi zyrtar kishte informacion se Maqedonia do të propozojë një votim për hyrjen e Kosovës në UNESCO, respektivisht se do të propozojë si pikë në rendin e ditës.
Presidenti i Serbisë, Aleksandar Vuçiç tha se të punësuarit në ambasadën serbe në Maqedoni janë tërhequr për konsultime, pasi që prej autoritetit kompetent të inteligjencës “kanë marrë prova të mjaftueshme për aktivitete ofensive kundër organeve dhe institucioneve të Serbisë.”
Pas paralajmërimit të Shkupit zyrtar për të ndryshuar qëndrimin e përmbajtjes me rastin e votimit për anëtarësimin e Kosovës në UNESCO, ministri i jashtëm serb Ivica Daçiç thotë se Serbia mund të ndryshojë qëndrimin e saj rreth emrit të Maqedonisë.
Përgatiti: Jeton Zenuni – /tesheshi.com/
