Blendi Gashi
Salla pritje të zbrazura, mungesë e dyqaneve, lëvizje të pakta të njerëzve, oborri jo i mirëmbajtur, prania e qenve endacakë – kjo është fotografia e parë që i del para një vizitori, apo udhëtari që për herë të parë gjendet para stacionit të trenit në Fushë Kosovë. E gjitha, kjo sikur lë përshtypjen se hekurudhat janë plotësisht jashtë funksioni.
Gjallëria që ishte dikur, tashmë thuajse nuk ekziston, e ardhje vajtjet e zhurmshme, mbeten vetëm kujtime të së kaluarës. Tani gjithçka është ndryshe, disa trena me disa udhëtarë, lëvizin nëpër disa qytete të Kosovës.
Hekurudhat, në shumicën e shteteve evropiane janë pothuajse mjeti më i përdorur për udhëtim, por kjo nuk ndodh edhe tek shteti ynë, pasi qytetarët më shumë si mjet transporti përdorin autobusët.
Për të mësuar më shumë për gjendjen e hekurudhave të Kosovës, linjat që operojnë, numrin e udhëtarëve, investimet që pritet të bëhen dhe çfarë është duke u bërë me çështjen e ndërtimit të autostradës hekurudhore Kosovë-Shqipëri, portali ‘Te Sheshi’, ka biseduar me zyrtarët e kompanisë INFRAKOS që merret me infrastrukturën hekurudhore dhe zyrtarët e kompanisë TRAINKOS që operon me trenat dhe transportin hekurudhor.
Ja kur do të funskionalizohet linja hekuruodhore për Mitrovicë
Rafet Çitaku, udhëheqës i Zyrës për Marrëdhënie me Publikun në Hekurudhën e Kosovës “INFRAKOS”, ka deklaruar për portalin ‘Te Sheshi’, se gjendja e hekurudhave të Kosovës aktualisht është e mirë duke pasur parasysh kompani qe ka qasje në rrjetin hekurudhor në Kosovë. Çitaku thotë se infrastruktura e hekurudhave të Kosovës e ka shfrytëzuar buxhetin e Kosovës në kapitalizmin e kompanisë ku është bërë furnizimi me makineri në mënyrë që të rritet jetëgjatësia e infrastrukturës së hekurudhave të Kosovës.
“Ndërmarrja e Infrastrukturës së Hekurudhave të Kosovës Sh.A ‘‘INFRAKOS’’ përgjatë vitit 2014 i ka implementuar shumë projekte me sukses duke e ngrit kapitalin e kompanisë dhe duke i zvogëluar shpenzimet, po ashtu gjatë viteve të kaluara kemi punuar shumë në mënyrë qe të përgatitemi për investimet në rehabilitimin e linjave hekrudhurore, me prioritet te atyre që ndërlidhen me rrjetin e hekurudhave të rajonit dhe Evropës, të cilat “INFRAKOS”, dhe Qeveria e Kosoves i ka vënë me prioritet. Jemi në fazën e zhvillimeve për rehabilimin dhe modernizimin e linjës dhjetë hekurudhore Hani i Elezit – Leshak në gjatësi prej 148 km, i cili projekt është planifikuar të bëhet në 3 faza”.
Lidhur me mosfunksionalizimin e linjës Fushë Kosovë-Mitrovicë, zëdhënësi Çitaku ka thënë se kjo linjë që nga shpallja e Pavarësisë është ndërprerë për çështje të sigurisë e cila është bartë edhe si problem i vazhdueshëm i bisedimeve teknike dhe politike në Bruksel.
“Por, ne jemi në rrugë të mbarë sa i përket trasesë dhe gjendjes që shtrihet në atë pjesë, kështu që pritet shumë shpejt që të futet në funksion edhe kjo linje. Përndryshe, linja në aspektin teknik është e gatshme që të operoj menjëherë”, ka deklaruar ai.
Kurse, sa i përket çështjes së ndërtimit të hekurudhës Kosovë-Shqipëri, zëdhënësi Çitaku, thotë se hekurudhat dhe shteti i Kosovës kanë qenë të gatshëm që të fillojnë teknikisht që të përgatiten për këtë projekt, por gatishmëria e shtetit të Shqipërisë mungon pasi që ajo kap një kosto të lartë financiare duke pasur parasysh largësinë dhe terenin e pjesës shqiptare.
“Në momentin që hekurudhat e Shqipërisë dhe Qeveria e Republikës së Shqiperisë do të jenë të gatshme të punojnë në këtë projekt, Hekurudhat e Kosovës dhe Qeveria e Kosovës do ta mbështetin projektin pa asnjë rezervë”, ka deklaruar Çitaku.
Ja sa persona kanë udhëtuar me tren gjatë 6 mujorit të parë të 2015
Zëdhënësi i Ndërmarrjes “Trainkos”, Valon Murseli, që operon me transportin hekurudhor ka treguar për portalin ‘Te Sheshi’, se sa persona kanë udhëtuar me tren gjatë vitit të kaluar dhe në gjashtë muajt e pare të këtij viti. Poashtu, ka treguar se sa linja operojnë për momentin, dhe cilat kategori janë të liruar nga biletat.
“Gjatë vitit 2014-të, numri i udhëtarëve që kanë përdor trenin si mjet të udhëtimit ka qenë; 352,410 udhëtarë. Gjatë gjashtë mujorit të parë të vitit 2015 numri i udhëtarëve është; 137,234 udhëtar”, ka deklaruar Murtezi.
Ai ka thënë se disa kategori që udhëtojnë me tren janë të liruar nga biletat, si veteranët e luftës, invalidët e luftës, familjarët e dëshmorëve (Prindërit, gruaja/burri fëmijët), pjesëtarët e Policisë së Kosovës, pjesëtarët e Forcave të Sigurisë së Kosovës, të verbrit dhe përcjellësit e tyre.
“Gjithashtu kemi zbritje prej 50% për student, fëmijë dhe të moshuarit mbi moshën 65 vjet, ku për ta realizuar këtë zbritje, udhëtari është i obliguar që të argumentoj se e gëzon të drejtën e zbritjes me anë të dokumentit përkatës, ndërsa studentët duhet të pajisen me ID kartelë të lëshuar nga Kompania Trainkos për të qenë të liruar nga pagesa prej 50%. Pra, ne si ndërmarrje Publike jemi në shërbim të qytetarëve dhe çmimet të cilat ne i ofrojmë janë shumë të volitshme. Çmimet e rregullta janë si vijon; Prishtinë-Pejë -3 €, Prishtinë- Shkup-4 €, Hani i Elezit- Fushe Kosove 2.20 €. Kompania Trainkos Sh.A. gjatë ditës operon me 10 Trena, ne relacionet Prishtinë-Pejë anasjelltas, Fushë Kosovë- Hani i Elezit anasjelltas dhe në linjën ndërkombëtare Prishtinë-Shkup Prishtinë”, ka deklaruar për portalin tonë zëdhënësi Murtezi. /tesheshi.com/
