Nga Ylli Pata
Që prej ditës së sotme, Shqipëria politike nuk është më si më parë. Jo vetëm se është ndryshuar thelbësisht ligji themeltar i shtetit, pra, Kushtetuta. Jo vetëm se është miratuar reforma në drejtësi e pritet një ndryshim radikal në gjyqësor, por ngaqë prej ditës së sotme Edi Rama dhe Ilir Meta do të nisin diskutimin e divorcit edhe formal, deri në largim përfundimtar.
PS-ja dhe LSI-ja do të ndahen përfundimisht, dhe qeverisja do të jetë krejt ndryshe, duke shtuar fjalëkryqet dhe intrigat e pallatit.
Ndërkaq, nga ana tjetër, opozita e Lulzim Bashës, por edhe vetë Ilir Meta me LSI-në, nuk do ta kenë të shtruar rrugën, teksa e nisin rrugëtimin e ri politik me një komunitet ndërkombëtar në antagonizëm. Sidomos Partia Demokratike.
Kjo pasi në betejën për të rritur influencën dhe protagonizmin në fushatën e reformës, opozita harxhoi aq energji kundër ambasadorit të Shteteve të Bashkuara, Donald Lu, dhe ambasadores së BE-së, Romana Vllahutin, sa do ta ketë shumë të vështirë për t’i rikuperuar marrëdhëniet.
Në fjalimin zyrtar në emër të opozitës, Oerd Bylykbashi i kishte braktisur ambasadorët më të rëndësishëm që u aktivizuan në proces. Ndërkohë Lulzim Basha falënderimin e tha nën zë.
Kurse mediat pranë Partisë Demokratike e sulmuan sërish mbrëmë ambasadorin Donald Lu, me pretendimin se ka dashur ta bllokojë reformën vetëm e vetëm që të rifutet në negociata, nga, sipas tyre, e paskan nxjerrë krerët e lartë të Departamentit të Shtetit.
Dokrra hini nga ana publicistike, por që shërbejnë si “bomba politike” për opozitën, sidomos me marrëdhëniet euro-amerikane.
Përveç hapjes së çështjes së “sovranitetit”, analizat, komentet, por edhe shpërthimet e njerëzve të opozitës ndaj zotit Lu dhe zonjës Vllahutin kanë qenë ekstreme. Deri edhe fyerje me “libër shpie” dhe nivel etike zero, duke i përmendur njërit origjinën e të parëve dhe duke e akuzuar tjetrën për gjithfarë turpesh, që nuk duhet të sillen në mendje, e jo më të nxirren nga goja. Proporcioni i sulmit, i cili në disa herë erdhi e u kthye në linçim publik, kaloi çdo lloj caku.
E gjithë kjo fushatë ishte e telekomanduar, pasi thjesht me një qëndrim të Bashës askush nuk do të guxonte më të shante e të fyente ambasadorët. Aq më shumë sot, kur përdoren si “qitësa” gazetarë që shkruajnë në muret e rrjeteve sociale vetëm “qoka politikanësh”.
Rreziku i sulmit ndaj diplomatëve kryesorë të angazhuar për reformën në drejtësi vjen edhe nga mbajtja e një qëndrimi, dukshëm të pritshëm, nga kancelaritë e Uashingtonit dhe Brukselit. Department i Shtetit nuk lejon kurrë të sulmohen diplomatët e saj. E provoi Berisha me Withers-in, dhe mori përgjigje të fortë, megjithëse në fillim iu duk e shijshme… /tesheshi.com/
