Ashtu siç kishin paralajmëruar, dhjetëra të rinj kanë protestuar sot (e mërkurë) para godinës së ministrisë së Arsimit. Me pankarta në duar, që mbanin mbishkrimin “Nikolla Dorëhiqu!”, ata kanë kërkuar largimin e ministres.
Pjesë e këtij grupimi, janë edhe studentë të lëvizjes “Për Universitetin”, të cilët janë shprehur kundër reformës në arsim që në momentin e parë të miratimit. Sipas tyre, kjo reformë nuk ishte në favor të studentëve, por përkundrazi, u mohonte të drejtën e studimeve të larta.
Të pranishëm ishin edhe forca të shumta policie, të cilët nuk i lejuan të rinjtë të protestojnë me argumentin se nuk kishin marrë leje.
Pak ditë më parë, në një aktivitet që po organizohej pranë Piramidës studentja Mirela Ruko, pjesë e lëvzjes “Për Universitetin” qëlloi me salcë në kokë ministren e Arsimit, Lindita Nikolla.
Disa javë më parë, qindra maturantë u ngritën në protestë para kryeministrisë, duke kërkuar ndryshimin e sistemit të pranimeve për në universitet. Shumë prej tyre deklaruan se kanë mesatare mbi 9-të dhe sërish nuk kishin rezultuar fitues në asnjë degë ku kishin aplikuar./tesheshi.com
