Gjatë natës, vandalët sulmuan linjat e telekomunikacionit në disa pjesë të Francës, duke ndërprerë disa shërbime fikse dhe celulare, shkroi të hënën në platformën X ministrja për Çështjet Dixhitale Marina Ferrari.
Një burim policor tha se ishte shumë herët për të thënë nëse kishte ndonjë lidhje me sabotimin e fundit në rrjetin hekurudhor, i cili shkaktoi kaos trafiku të premten, vetëm disa orë përpara ceremonisë së hapjes së Lojërave Olimpike të Parisit.
Ferrari e quajti vandalizmin “frikacak dhe të papërgjegjshëm”, duke shtuar se të gjitha shërbimet përkatëse janë duke u angazhuar për të rifilluar shërbimet, raportoi Reuters.
Një zëdhënës i operatorit të telekomunikacionit SFR tha se vandalët ndërprenë rrjetin e tij në distanca të gjata në pesë pjesë të ndryshme të Francës pak pas mesnatës të së hënës dhe se ndikimi te klientët ishte minimal sepse rrjeti ishte projektuar në mënyrë që i gjithë trafiku të mund të ridrejtohej.
Gazeta Le Parisien raportoi më herët se kabllot e energjisë elektrike u ndërprenë në Francën jugore dhe instalimet u vandalizuan në rajonin Meuse pranë Luksemburgut dhe zonën Oise pranë Parisit, duke prekur kryesisht shërbimet e linjës fikse.
Shërbimet e trenave më në fund u normalizuan të hënën në mëngjes, tha ministri i Transportit Patrice Vergriete.
Rreth 800,000 njerëz kishin vështirësi me transportin, duke përfshirë 100,000, transporti i të cilëve me trena duhej të anulohej plotësisht. /tesheshi.com/
