Turqia ka hapur një faqe të re në marrëdhëniet e saj me fqinjët e partnerët ndërkombëtarë. Pas hapave të bërë për përmirësimin e këtyre marrëdhënieve me Rusinë e Izraelin, në synimin e Turqisë janë Siria e Iraku.
“Turqia kërkon të ketë marrëdhënie të mira me Sirinë e Irakun,” deklaroi kryeministri i vendit, Binali Jëlldërëm, ditën e sotme.
“Ne do ta zgjerojmë rrethin e miqësisë sa të jetë e mundur. Ky është synimi ynë. Do ta zgjerojmë atë brenda dhe jashtë vendit. Tashmë kemi filluar ta bëjmë këtë. I kemi kthyer në normalitet marrëdhëniet tona me Izraelin dhe Rusinë. Jam i sigurt se do t’i kthejmë në normalitet dhe me Sirinë. Kemi nevojë për këtë. Siria dhe Iraku duhet të kenë stabilitet për të patur sukses në luftën kundër terrorit,” theksoi ai në fjalën e tij në një takim me drejtuesit lokalë të partisë në pushtet, AKP-së.
“Normalizimi i marrëdhënieve me të gjithë fqinjët, duke përfshirë Sirinë dhe Irakun, është detyra jonë e pashmangshme,” vuri në pah shefi i qeverisë turke.
Emërimi i Binali Jëlldërëmit si kryeministër i Turqisë në fund të majit të këtij viti u bashkëshoqërua dhe me nismën për përmirësimin e marrëdhënieve konfliktuale me të gjitha vendet fqinje dhe të rajonit. /tesheshi.com/
