Qeveria shqiptare ka çelur këtë të martë garën për ndërtimin e portit të ri tregtar të Durrësit në Porto Romano.
Ministrja e Energjisë dhe Infrastrukturës, Belinda Balluku njoftoi se 15 kompani ndërkombëtare do të garojnë për këtë projekt, që sipas saj, është finalizim i 420 mijë orëve punë prej ekspertëve vendas dhe të huaj.
Balluku shtoi më tej se ndërtimi i porteve tregtare dhe komerciale në Durrës dhe Vlorë do të pasohet nga projekte të ngjashme edhe në Sarandë dhe Lezhë për t’i dhënë jetë infrastrukturës detare në vend.
“Çelim sot garën për ndërtimin e portit në Porto Romano, që e kemi quajtur porti i shqiptarëve pasi do t’i
shërbejë edhe Kosovës dhe Maqedonisë së Veriut, i lidhur përmes hekurudhës me dy porte të thata në Strugë dhe Prishtinë. Me ndërtimin e portit të ri tregtar do të bëjmë realitet premtimin për t’i dhënë Durrësit dhe Vlorës dy porte komerciale dhe marinat tregtare. Portet e Sarandës dhe Lezhës do të jenë të radhës. Sot këtu kurorëzohen katër vite punë nga një ekip prej 100 ekspertësh. Janë mbi 420 mijë orë pune dhe një mal me analiza dhe studime, që po të vendosnim këto letra A4, t’i shtrinim në bregdetin shqiptar nuk do të mjaftonin. Tani jemi me 15 kompani ndërkombëtare që do të jenë pjesë e garës”, tha ajo që ndryshe është dhe numri dy i qeverisë.
Balluku tha se porti i ri tregtar në Porto Romano do të jetë më i thellë dhe me sipërfaqe më të madhe të terminalit se ai aktual.
“Duam të ndërtojmë një port dyfish më të thellë se ai që kemi sot në Durrës. Do ndërtojmë një terminal kontejnerësh trefish më të madh, të gjelbër dhe të automatizuar. Duam të zhvillojmë infrastrukturën detare që hedh baza për zhvillim të mëtejshëm. Duam që të ngremë një infrastrukturë për krijimin e një baze autonome detare në kuadër të diskutimit me aleatët tanë në NATO. Durrësit dhe Porto Romano janë anët e së njëjtës medalje. Durrësi me dy porte është një realitet i prekshëm”, tha ajo.
Po pse Balluku e quajti “porti i shqiptarëve”?
“E kemi quajtur ‘porti i shqiptarëve’ pasi ky port nuk do i shërbejë vetëm Shqipërisë, por edhe Kosovës edhe Maqedonisë së Veriut, i lidhur përmes hekurudhës me dy porte të thata përkatësisht në Prishtinë dhe në Strugë”.
Më tej, kryeministri Rama tha se projekti do të hapë një faqe të re për Shqipërinë,
“Shqiptarët kanë jetuar nën zgjedha që kanë ardhur si rezultat i të të tjerëve për ta. Për herë të
parë shqiptarët në këto 30 e kusur vite jetojnë me zgjedhjen e tyre. Nga momenti i asaj zgjedhje, deri te zgjidhjet është një histori më vete. E shkuara është njësoj si porti i Durrësit në mes të qytetit. Porti është një plagë mjedisore, një plagë fizike. Largimi i portit të Durrësit nga qendra e qytetit dhe vendosja e tij këtu me një tipologji me përmasa të reja, është hapja e një kapitulli të ri në historinë tonë kombëtare”, tha ai, duke shtuar:
“Ky port që ndërtohet nga e para, është një port i ri në Europë pas shumë e shumë dekadash. Ne kemi fatin që duke qenë në fund të kësaj kolone të gjatë, të marrim përfitimin e dijeve ndër vite, të kemi një port që do të jetë shembull ekselence.
Ky port do të lidhë tregtinë me pjesën tjetër të rajonit dhe më gjerë, përmes hekuruadhave dhe përmes dy porteve që do ndërtohen në Prishtinë dhe Strugë, do të orientojë shumë flukse tregtare. Porto do të sjellë punësim cilësor të mirëpaguar,” u shpreh Rama.
Pra, pas Rrugës së Kombit, vjen Porti i Kombit. /tesheshi.com/
