Presidenti rus Vladimir Putin bëri thirrje për gjueti për “tradhtarët” në fjalimin e tij në Shërbimin Federal të Sigurisë së Rusisë (FSB) të martën, pasi fitoi një mandat të ri presidencial.
Ata duhet të identifikohen dhe të ndëshkohen, tha Putin me një ton dukshëm të zemëruar.
“Ne do t’i ndëshkojmë pa afat, kudo që janë”, tha ai, duke shtuar se Rusia nuk do t’i harrojë tradhtarët që kryen krime kundër shtetit.
Janë regjistruar disa raste të vrasjeve të rusëve, disa prej tyre gjatë kohës që ndodheshin jashtë vendit, apo të vdekjes në rrethana të pashpjegueshme.
Putini iu referua në mënyrë specifike sulmeve të Ukrainës në rajonin kufitar të Belgorodit, ku kohët e fundit ndodhën viktima civile. Sulme intensive ndodhën në rajon gjatë zgjedhjeve presidenciale mes të premtes dhe të dielës.
Presidenti rus foli për terrorizëm, qëllimi i të cilit ishte prishja e votimit. Ai akuzoi “grupet terroriste dhe sabotuese” që veprojnë së bashku me forcat ukrainase, mercenarët dhe “llumrat” e tjerë. Kjo e fundit mund t’u referohet shtetasve rusë që dezertuan në palën ukrainase.
Presidenti i bëri thirrje gjithashtu FSB-së që të bashkëpunojë me shërbimet e tjera të inteligjencës në forcimin e operacioneve kundër terrorizmit.
“Ne po përballemi me një kundërshtar të fortë dhe të rrezikshëm, i cili ka një gamë të gjerë informacioni, burimesh teknike dhe financiare në arsenalin e tij”, tha Putin.
Ai kujtoi shpërthimet në tubacionet e gazit Nord Stream 1 dhe 2 në Detin Baltik në vitin 2022.
Është gjithashtu e nevojshme të forcohet siguria kufitare, për shembull duke rritur efikasitetin e njësive të lëvizshme, tha Putin. Ai iu referua kufijve tokësorë dhe detarë, përfshirë Detin e Zi, ku forcat ukrainase ishin të suksesshme kundër marinës ruse.
FSB është, ndër të tjera, përgjegjëse për mbrojtjen e kufijve të Rusisë. /tesheshi.com/
