Presidenti Meta i është kthyer betejave me qeverinë, duke patur në fokus sërish çështjen e Teatrit Kombëtar, mes shumë fronteve të tjetra. Ai vendosi të çojë në Kushtetuese aktin e kalimit të teatrit nga qeveria në pronësi të Bashkisë.
“Sot depozitova kërkesën për shfuqizimin e vendimit të qeverisë për kalimin e Teatrit Kombëtar në pronësi të Bashkisë. Për fat të keq qeveria shpreh vullnetin që me kalimin e pronësisë, Bashkia duhet ta shembë dhe të ndërtojë godinën e re”, arsyetoi Meta.
Në gjykimin e tij, siç tha, “shqiptarët rrezikohen që të humbasin një pasuri publike me interes të lartë”.
“Synohet të zhduket dhe memoria jonë të humbasë. Vendimi është anti-kushtetues për cënimin e pasurisë kombëtare”, tha Meta.
“Duke qenë se kjo pasuri është Teatri Kombëtar dhe që lidhet me interesin e përgjithshëm kombëtar, bashkia nuk mund të ketë në pronësi dhe aq më tepër të shprehet dhe të tejkalojë kufijtë. Pronësia duhet të qëndrojë vetëm në emër të Republikës së Shqipërisë”, theksoi kreu i shtetit.
Ndërkohë, ditë më parë, Veliaj publikoi dokumenta se si nën qeverisjen PD-LSI, Teatri Kombëtar, pra godina, nuk ishte e përfshirë në listën e vlerave monumetale të trashëgimisë për qendrën e Tiranës. /tesheshi.com/
