Presidenti Meta ofroi një skenë të pazakontë të tijën me një qen, duke e puthur në ballë këtë të fundit. Ndodhi kjo në ceremoninë e vlerësimit të Forcave të Sigurisë së Kosovës, për kontributin e tyre në operacionet e shpëtimit pas tërmetit të 26 nëntorit.
“Nuk ka emër dhe vlerësim më të mirë, sesa ‘shpëtimtar’ për të gjithë ju të FSK. Do donim t’i festonim festat e nëntorit së bashku, por ja që nuk ishte e thënë. Megjithatë, edhe ky 28 nëntor që sapo lamë pas, na gjeti të përbashkuar si asnjëherë tjetër në historinë tonë, të gjithë shqiptarëve, për t’u përballur me pasojat katastrofike të tërmetit shkatërrimtar të 26 nëntorit”, tha Meta.
“Marrëdhënia jonë me Kosovën është e palëkundur edhe në momente dramatike. Kosova ka një zemër bujare, edhe ata në pamundësi ekonomike shprehën solidaritet, duke ndarë edhe varfërinë e tyre. Tërmeti i 26 nëntorit tundi fort themelet e shumë ndërtesave në Shqipëri, dhe madje i rrëzoi shumë keq disa prej tyre, por tregoi se themelet e solidaritetit mbarëshqiptar janë më të forta se kurrë”, shtoi më tej kreu i shtetit.
Kujtojmë se një skenë me qen pati dhe kryeminisitri Rama pak ditë më parë, pasi një qytetar iu ankua se nuk po e lënë të akomodohet në hotel prej qenit. /tesheshi.com/
