Një ditë pasi u publikua platforma e lëvizjes për ringritjen e PD-së, një nga mbështetësit e saj, ish-ministri i Financave, Ridvan Bode, tha se zgjedhjet në partinë më të madhe të opozitës janë një kusht i panegociueshëm.
Në platformë, kritikët dhe kundërshtarët e Bashës, kërkojnë organizimin e zgjedhjeve për kreun e partisë brenda një periudhe 9 mujore. Në këtë kuadër, Bode e cilëson këtë pikë si kryesoren dhe që do t´i shërbejë unifikimit të partisë.
“Një grup drejtuesish të PD, anëtarë kryesie, të këshillit, ish-drejtues, i janë drejtuar anëtarësisë për një prpçes që synon unifikimin e partisë, për një proçes zgjedhor të përgjithshëm.
Bashkimi i PD përmes një proçesi zgjedhor është qëllimi ynë. Të kërkohet ndjesë publike, të mundësohet hapja e një debati për kapërcimin e problemit, që ka lidershipi, i cili vuan nga mungesa e kredibilitetit.
Nuk jemi organizim juridik, por lëvizje brenda PD. Do i drejtohemi dhe zyrtarisht parties, por tashmë kërkesa është publike.
Do takojmë demokratët anembanë Shqipërisë. Do jetë një platformë që do ta diskutojmë me të gjithë anëtarësinë.
Qëllimi i lëvizjes nuk është të gjejë konsensus mes nesh e drejtuesve aktualë, qëllimi është më i gjerë, bashkimi përmes një analize të thellë dhe jo të diktuar e më pas të shkohet në zgjedhje në gjithë nivelet përmes devizës së bashkimit.
Nuk kërkojmë ndarje postesh, por pajtim përmes nje debati të përgjithshëm, analizës dhe zgjedhjeve.
Rizgjedhja e kryetarit është kusht i panegociueshëm. Kjo i bën mirë dhe kryetarit për kredibilitetin e tij të bjerrur.
Nuk po kërkojmë fraksione dhe as përfaqësim të cilësuar. Duam votime dhe të drejta të barabarta në votime dhe le të jetë anëtarësia që të vendosë”, tha ai. /tesheshi.com/
