Vitit shkollor po i afrohet fundit, ndërsa ‘plenumi i nxënësve’ të shkollave të mesme në Maqedoni vazhdon grevën pasi nuk ka arritur të caktojë takim me ministrin për Arsim. Nxënësit thonë se kanë përkrahje nga profesorët dhe prindërit e tyre dhe të gjithë së bashku janë të vetëdijshëm se me grevën humbin nga procesi arsimor, por atë e shohin si masë të vetme për të realizuar kërkesat e tyre.
“Nëse së shpejti nuk marrim përgjigje nga kompetentët do të ketë marshe të reja protestuese”, paralajmërojnë nxënësit, të pakënaqur nga siç thonë, reformat e këqija në arsim të cilat ministria u mundua t`i zbusë me takimet që kishte me Unionin e shkollave të mesme, union ky jolegjitim për ‘plenumin e nxënësve’, sepse nuk është trup aktiv, por shërben si vegël e pushtetit.
‘Plenumi i nxënësve’, u formua javë më parë, respektivisht atëherë kur ministria për Arsim ndryshoi mënyrën e dhënies së maturës shtetërore.
“Është e pamundur që me disa pyetje të bëhet vlerësimi i punës sime njëvjeçare. Kam mësuar një vit të tërë në 12 lëndë të ndryshme, prandaj është shumë normale të harroj diçka nga materiali.Afati disaditor për përgatitje nuk mjafton që të freskoj memorien” na tha një nxënës.
Nxënësit e shkollave të mesme aplikuan përvojën e studentëve, të cilët protestuan muaj më parë për të ashtuquajturin provim shtetëror, por u ballafaquan me presione të papara të llojit se do të përjashtohen nga shkolla, se prindërit e tyre do të përjashtohen nga puna, e për më tepër se se prindërit do të paguanin dhe gjobë në vlerë prej 2000 euro për secilin fëmijë të tyre që proteston.
Ndërkohë, bojkoti i mësimit vazhdon të zhvillohet në Shkup, Kumanovë, Strugë, Manastir, Ohër, me paralajmërim për shtrirje edhe në qytete tjera. /tesheshi.com/
