Acarimi i marrëdhënieve ndërmjet Moskës dhe Ankarasë po ndryshon tektonikën e zhvillimeve gjeopolitike në rajon.
Një vendet me marrëdhënie problematike me Turqinë, Greqia prej ardhjes në pushtet të Alexis Tsipras po shkon fuqishëm drejt një pakti afatgjatë dhe të çimentuar me Moskën.
Athina po lëviz shpejt drejt një krijimi të një poli energjie alternativ me Perëndimin.
Javën që vjen pritet një takim i rëndësishëm në Athinë i numrit dy të ministrisë së Energjisë së Rusisë në lidhje me çështjet e gazësjellësave që i interesojnë Moskës, por që nuk ka gjetur parneritet në Turqi si pasojë e prishjes së marrëdhënieve pas rrëzimit të avionit rus.
Plani i Athinës është që “Rryma e Jugut” të arrijë Greqinë pa hyrë në Turqi, duke kaluar nëpërmjet Bullgarisë direkt nëpër Serbi e prej andej në veri të Europës.
Ministri i jashtëm, Nikos Kotzias, deklaroi në fund të muajit të shkuar se “Greqia synon të bëhet një qendër energjie”.
“Ne shikojmë përpara në furnizimin me energji dhe të shërbejmë si terminale gazësjellës me Iranin, Azerbaxhanin, Irakun dhe rajonet Kurde, Rusinë dhe SHBA-në”, tha kreu i diplomacisë së Athinës.
Çështja e depërtimit të Rusisë në Ballkan është kthyer prej kohësh në një debat politik ndërmjet vendeve të Bashkimit Europian.
Gjatë verës, presidentja e Kroacisë, Kolinda Grabar-Kitaroviç, e cila para se të zgjidhej në postin aktual ka qenë numri dy i NATO-s, ka lëshuar alarmin se Ballkani gjendet para një rreziku rus.
Grabar-Kitaroviç, gjatë një vizite në Austri, ka deklaruar për të përditshmen “Die Presse” se në rajon është shënuar një kthim prapa dhe ka përmendur si shembull Maqedoninë.
Presidentja kroate tha se nga njëra anë e vëren rritjen e ndikimit rus në aspektin ekonomik, gjeopolitik dhe në fushën e sigurisë dhe nga ana tjetër lodhjen e Bashkimit Europian nga zgjerimi.
“Deklarata e presidentit të Komisionit Europian Jean-Claude Juncker se asnjë vend nuk do të anëtarësohet gjatë mandatit të tij, i përgjigjet fakteve për shkaqe teknike, sepse nuk mjafton koha. Por ky konstatim keqkuptues e ka dekurajuar mbarë rajonin”, tha Kolinda Grabar-Kitaroviç.
Presidentja kroate tha se Ballkani mund të arrijë paqen e përhershme, stabilitetin dhe prosperitetin vetëm brenda BE-së dhe NATO-s.
Në fakt këtë paralajmërim e kanë bërë edhe kryeministri shqiptar Edi Rama dhe ministri i Jashtëm Bushati, gjatë intervistave për shtypin europian. /tesheshi.com/
