Pas njoftimit të Putinit: ç’është mobilizimi i pjesshëm ushtarak?

Presidenti rus Vladimir Putin njoftoi të mërkurën një mobilizim të pjesshëm ushtarak.

Putin, i cili filloi t’i drejtohet kombit të mërkurën në mëngjes, tha në fillim të fjalimit të tij se Perëndimi “dëshiron të shkatërrojë vendin tonë” dhe se “kjo ka të bëjë me mbrojtjen e Rusisë dhe territorit të Donbasit”.

Ai tha se Rusia e mbështet atë popullsi dhe nuk ka të drejtë ta braktisë atë.

Dhe çfarë është mobilizimi i pjesshëm ushtarak?

Mobilizimi i pjesshëm ushtarak është një term që përdoret praktikisht në të gjithë botën, por ai mund të ndryshojë nga vendi në vend në disa aspekte.

Në rastin e Rusisë, ashtu siç tha Putin, mobilizimi i pjesshëm ushtarak do të thotë që rezervistët do të thirren nën armë e të shkojnë në front.

Menjehërë pas Putinit, foli ministri i Mbrojtjes Sergei Shoigu, i cili  njoftoi se Rusia do të fillojë menjëherë mobilizimin e 300,000 rezervistëve.

“Rezervat tona njerëzore janë të mëdha dhe arrijnë në 25 milionë njerëz dhe ky mobilizim përfaqëson vetëm një për qind të potencialit”, tha ministri rus i Mbrojtjes.

Njerëzit me përvojë të mëparshme ushtarake do të mobilizohen dhe ata do t’i nënshtrohen trajnimit përpara se të shkojnë në fushën e betejës.

Shoigu tha se humbjet ruse në njerëz në luftën në Ukrainë deri më tani janë 5,937 jetë.

Kjo lëvizje e Moskës vjen pas një tjetër disfate në fushëbetejë, që ishte humbja e Kharkivit. Njëherësh, Ukraina njoftoi rimarrjen e një zone në Donbas, duke paralajmëruar se do rifitojë të gjitha territoret e humbura, madje dhe Krimenë. /tesheshi.com/