Kryeministri Kurti dha versionin e tij se ç’ndodhi në më të fundit takim në Bruksel me Vuçiçin përballë dhe me dyshen Borrel-Lajçak në mes si ndërmjetësues. Ndaj këtij të dytit, kreu i qeverisë kosovare ishte tejet kritik.
“Propozova një plan sekuencimi se si të bëhet zbatimi i Marrëveshjes së Ohrit. As nga BE e as nga Serbia nuk ka pasur propozim. Ky është takimi i parë në nivel të lartë ku ne bisedojmë mbi implementimin e marrëveshjes dhe sekuencimin e tij. Unë sot e kuptova se Serbia asnjëherë nuk ka propozuar një dokument të sekuencimit, por ka dorëzuar një dokument që kushtëzon zbatimin e marrëveshjes me formimin e Asociacionit. Kjo na kthen në prillin e vitit 2013. Tani jemi 10 vjet pas. Të gjitha marrëveshjet janë brenda nenit 10 të Marrëveshjes Bazike në Bruksel”, ka theksuar Kurti para mediave, duke vijuar me teorizimin e tij politik:
“E janë 39 sosh gjithsej. Por nuk mundet nga neni 10 nga 39 marrëveshje të përzgjidhet vetëm një e tillë dhe të vendoset sikurse qerrja para kuajve. Të bëhet edhe thelb edhe përakt. Një kushtëzim të tillë unë nuk e kam pranuar. Është për të ardhur keq që emisari evropian Lajçak e ka pranuar një kushtëzim të tillë dhe kushtëzimin nga Serbia që e ka pranuar ai e ka bërë në cenim të funksionit të tij si lehtësues e ndërmjetësues, por unë nuk mund ta pranoja një gjë të tillë duke cenuar asisoj Kosovën, kryeministër i së cilës jam. Ne kemi bërë një propozim dhe është për të ardhur keq se pikërisht kur jam konstruktiv dhe bëj propozime shkaktohet një lloj nervoze në dhomë dhe vështirësohet dialogu”.
Për Kurtin, ngecja vjen nga kushtëzimi serb me përkrahës Lajçakun.
“Unë sot e mora vesh pse qe gjashtë muaj nuk ec puna me zbatimin e sekuencuar të marrëveshjes, sepse Serbia ka vënë si kushtëzim formimin e Asociacionit. E ky kushtëzim i Serbisë është shndërruar në qëndrim të Lajçakut. E për të ecur përpara kjo duhet të tejkalohet”, ka shtuar Kurti.
“Pala serbe nuk ka sjellë propozim por kushtëzim”, theksoi Kurti. /tesheshi.com/
