Zgjerimi i Bashkimit Evropian paraqet një investim gjeostrategjik në paqe, siguri, stabilitet dhe prosperitet, thuhet në deklaratën përfundimtare të liderëve të BE-së pas samitit në Granada.
“Zgjerimi është një shtytës për përmirësimin e kushteve ekonomike dhe sociale të qytetarëve evropianë, duke reduktuar pabarazitë ndërmjet vendeve. Ai duhet të ushqejë vlerat mbi të cilat bazohet BE-ja”, thuhet në deklaratë.
Shtohet se vendet kandidate, por edhe anëtarët e BE-së, duhet të jenë të gatshme për zgjerim.
“Vendet kandidate duhet të përshpejtojnë reformat, veçanërisht në fushën e sundimit të ligjit. Në të njëjtën kohë, Unioni duhet të kryejë reformat e brendshme të nevojshme”, thuhet në dokument.
E ardhmja e vendeve kandidate qëndron në BE
Thuhet se pandemia e koronavirusit dhe agresioni rus kundër Ukrainës kanë testuar qëndrueshmërinë e Unionit dhe kanë treguar nevojën që BE të forcojë sovranitetin e saj.
Udhëheqësit e BE-së thonë se janë të vendosur të marrin më shumë përgjegjësi për sigurinë dhe mbrojtjen e tyre, por edhe për të ndihmuar Ukrainën.
“Ne do të vazhdojmë të mbështesim Ukrainën dhe popullin e saj për aq kohë sa të jetë e nevojshme. Gjithashtu konfirmuam se e ardhmja e vendeve kandidate dhe e qytetarëve të tyre qëndron në BE”, thuhet në deklaratë.
Theksohet se BE-ja do të forcojë mbrojtjen e saj, se do të investojë në zhvillimin e teknologjisë dhe industrisë dhe se do të luftojë kundër kërcënimeve kibernetike dhe hibride, si dhe kundër fushatës së dezinformimit.
Qëndrueshmëria e modelit ekonomik evropian
Në të njëjtën kohë, BE do të investojë në tranzicionin e gjelbër dhe dixhital, “për të siguruar qëndrueshmërinë e modelit ekonomik europian”.
“Ne do të vazhdojmë përpjekjet tona për të ndërtuar një treg të vetëm më koheziv, inovativ dhe të ndërlidhur, duke ruajtur integritetin, dimensionin social dhe hapjen e tij, duke siguruar një fushë loje të barabartë dhe duke reduktuar barrën administrative,” thuhet në deklaratë.
Udhëheqësit e BE-së u zotuan të forcojnë bashkëpunimin me vendet nga të gjitha rajonet e botës, në mënyrë që “të mbrojnë dhe avancojnë rendin ndërkombëtar bazuar në parimet e Kombeve të Bashkuara”. /tesheshi.com/
