Një tjetër raund i pasuksesshëm i bisedimeve ndërmjet Serbisë dhe Kosovës në Bruksel. Përfaqësuesi i Lartë i BE-së Josep Borell paralajmëron se situata në veri të Kosovës mund të bëhet kritike.
Në bisedimet në Bruksel me ndërmjetësimin e Bashkimit Evropian, përfaqësuesit e Serbisë dhe Kosovës nuk arritën asnjë afrim në kontestin për situatën e tensionuar në veri të Kosovës, transmeton agjencia gjermane dpa. Vetëm në fillim të takimit u arrit një marrëveshje në lidhje me Deklarimin e Personave të Zhdukur.
Fatkeqësisht, presidenti serb Aleksandar Vuçiç dhe kryeministri i Kosovës Albin Kurti nuk arritën një marrëveshje, tha përfaqësuesi i lartë i BE-së për Politikë të Jashtme dhe Siguri, Josep Borell, të martën vonë në mbrëmje, më 2 maj.
Ai ka frikë se situata tani mund të bëhet kritike dhe pas zgjedhjeve të parakohshme lokale të fundit, ka potencial për përshkallëzim.
Agjencia dpa rikujton në raportin e saj se një javë e gjysmë më parë, kandidatët e partive shqiptare fituan zgjedhjet në veri të Kosovës me shumicë serbe, pasi Lista Serbe, e cila kontrollohet nga Beogradi, bëri thirrje për bojkot.
Lista Serbe e ka arsyetuar bojkotin e saj me faktin se lidershipi në Kosovë ende nuk i ka krijuar kushtet për formimin e Unionit të Komunave Serbe me kompetenca të gjera ekzekutive.
Zgjedhjet e jashtëzakonshme lokale u bënë të nevojshme, sepse të gjithë zyrtarët dhe nëpunësit civilë të nacionalitetit serb dhanë dorëheqje në nëntor të vitit të kaluar në shenjë proteste kundër politikave të qeverisë së Kosovës, sqaron dpa.
Kërcënimi indirekt i Borellit
Bashkimi Evropian ka vite që përpiqet të ndihmojë në qartësimin e marrëdhënieve mes Serbisë dhe Kosovës, por kjo rezulton të jetë jashtëzakonisht e vështirë, vlerëson dpa dhe kujton se Kosova, sot e banuar pothuajse ekskluzivisht nga shqiptarët, u nda nga Serbia në vitin 1999 me ndihmën e NATO-s dhe shpalli pavarësinë në vitin 2008.
Më shumë se 100 vende, përfshirë Gjermaninë, e njohin pavarësinë e Kosovës, ndërsa të tjerat, përfshirë Serbinë, Rusinë, Kinën dhe pesë vende të BE-së, nuk e kanë bërë këtë deri më sot, raporton dpa.
Të martën në mbrëmje, më 2 maj, Borell theksoi se bisedimet duhet të vazhdojnë. Ai indirekt kërcënoi se nëse negociatat dështojnë, as Kosova e as Serbia nuk do të mund të hyjnë në Bashkimin Evropian. Agjencia gjermane rikujton se Serbia është kandidate zyrtare për anëtarësim që nga viti 2012 dhe se Kosova konsiderohet kandidate potenciale për anëtarësim, transmeton dw.com. /tesheshi.com/
