Presidenti i SHBA-së, Donald Trump e shkarkoi drejtursin e fushatës pasi sondazhet treguan një rënie të konsiderueshme të mbështetjes së votuesve me gati 15 pikë prapa Joe Biden, me pak më shumë se tre muaj përpara zgjedhjeve.
Brad Parscale, drejtuesi i presidentit të fushatës së rizgjedhjes, është pushuar nga puna, dhe ai do të zëvendësohet nga Bill Stepien, një operativ republikan, i cili bashkëpunon me Trump që nga viti 2016.
Parscale, si një këshilltar i vjetër në fushatë, mbetet përgjegjës për strategjinë dixhitale. Ai ka qenë me Trump pothuajse që nga momenti kur njoftoi kandidaturën e tij presidenciale në vitin 2015. Ai ishte arkitekti kryesor i fushatës së tij në media sociale.
Sipas sondazhit të fundit të Universitetit Quinnipiac, ish-zv.presidenti demokrat Joe Biden gëzon mbështetjen e 52 përqind të të anketuarve, ndërsa Trump 37 përqind.
Sondazhet e tjera tregojnë se Trump po mbetet pas Biden-it në shtetet kryesore ku ai duhet të fitojë nëse dëshiron të qëndrojë në Shtëpinë e Bardhë.
Sipas sondazheve, Trump mbetet pas Biden-it edhe për sa i përket ekonomisë, e cila ka qenë prej kohësh aseti i tij më i fortë.
Kur bëhet fjalë për administrimin e krizës së koronavirusit, Trump ka mbështetjen e 32 përqind të të anketuarve, ndërsa 62 përqind besojnë se ai nuk veproi si duhet.
Gjithashtu, vetëm 39 përqind mendojnë se Trump kujdeset për “amerikanin mesatar”, ndërsa Biden u vlerësua pozitiv nga 59 përqind e të anketuarve. /tesheshi.com/
