Qeveria “Rama2” pas miratimit në Kuvend me 78 vota pro dhe 51 kundër, do të betohet sot në orën 17:00 para presidentit Ilir Meta. Ky moment shënon zyrtarisht dhe përfundimin e proçedurave ligjore dhe nisjen zyrtarisht nga puna të saj.
Miratimi në qeverisë dhe programit të saj në Kuvend u bë mëngjesin e sotëm pas një séance maratonë që nisi të martën në orën 09:00. Në diskutimet dhe debatet mbi qeverinë pothuajse folën të gjithë deputetët, ndërsa opozita (PD+LSI) u shprehën kundër.
Seanca kaloi pa debate të ashpra mes palëve, kjo edhe për faktin se kreu i Kuvendit, Gramoz Ruçi, nuk lejoi që nga nisja e saj, shkeljen e rregullores.
Madje, Ruçi nuk lejoi asnjë deputet që të kalonte kohën e parashikuar nga Rregullorja, 20 minuta, duke vebndosur për herë të parë një standard që i mungonte parlamentit shqiptar.
Kjo ndodhi edhe në rastin e ish-kryeministrit Sali Berisha, i cili duket se do ta ketë të vështirë në këtë legjislaturë të sillet njëlloj si në të shkuarën, kur fjalimet zgjasin me orë dhe përtej rendit të ditës.
Të paktën në 3 seancat e para parlamentare, Ruçi arriti të vendosë një rregull, i cili nuk dihet se sa do mund të zgjasë, edhe pse kryeministri Edi Rama ka deklaruar se nuk do të lejohet më që Kuvendi të merret peng nga interesat e partive, sikundër ka ndodhur më parë. /tesheshi.com/
