Presidenti amerikan Donald Trump, i ka uruar fitoren atij që tashmë është bërë 100 përqind homolog i tij në kuptimin konstitucional, Rexhep Tajjip Erdogan, pas fitores në zgjedhjet e së dielës. E ka uruar jo me deklaratë por me bisedë telefonike.
Të dy udhëheqësit ranë dakord të përmirësojnë marrëdhëniet dypalëshe në fushën e mbrojtjes dhe sigurisë, raporton Reuters.
Në bisedën telefonike, Trump dhe Erdogan theksuan nevojën për të zbatuar planin e dakorduar paraprakisht për Manbij-in dhe ranë dakord të bashkëpunojnë në luftën kundër terrorizmit, thuhet në njoftim.
Marrëdhëniet mes dy aleatëve të NATO-s kanë qenë të tendosura muajve të fundit, për shkak të mbështetjen amerikane ndaj forcave kurde në Siri dhe blerjes nga Turqia të sistemit rus S-400, kujton Reuters.
Trump dhe Erdogan do të takohen në Bruksel në samitin e NATO-s më 11 dhe 12 korrik, informon më tej Reuters.
Një urim për Erdoganin rezervoi më parë dhe kancelarja Merkel, e cila gjithashtu ka patur marrëdhënie të acaruara me liderin turk. /tesheshi.com/
