Në përfundim të mbledhjes së grupit parlamentar të Partisë Demokratike, në të cilën u fol për takimin Rama-Basha dhe dështimin e negociatave, ish-Kryeministri Sali Berisha deklaroi për mediat se mbrëmë opozita votoi reformën dhe variantin e sugjeruar nga ndërkombëtarët.
Berisha nuk kurseu akuzat ndaj Kryeministrit Rama, për të cilin tha se shkoi me dy fjalime në xhep, ndërsa për ndërkombëtarët u shpreh se “është mjerane kur një përfaqësues ndërkombëtar i raporton qeverisë së tij të kundërtën e asaj që i ka thënë vetes”.
“Për çdo shqiptar që i thotë dritës së diellit dritë, të vërtetës të vërtetë, opozita shqiptare mbrëmë votoi reformën, e refuzoi në mënyrë kategorike njeriun që shkoi me një apo dy fjalime në xhep. Opozita votoi variantin që ia kanë sugjeruar dhe premtuar ndërkombëtarët. Variantin që ndërkombëtarëve ua ka sugjeruar Edi Rama.
Është mjerane kur një përfaqësues ndërkombëtar i raporton qeverisë së tij të kundërtën e asaj që i ka thënë vetes”, – ishin fjalët e ish Kryeministrit Sali Berisha. /tesheshi.com/
