Në përfundim të mbledhjes së sotme të komisionit për reformën në drejtësi, deputeti demokrat Eduard Halimi deklaroi se gjatë mbledhjes pati diskutime për nenin 3 që ka të bëjë me dekriminalizimin si dhe me nenin 6/1.
Sipas Halimti, reforma në drejtësi kërkon të largojë ata persona që kanë kryer krime të rënda në çdo kohë, vend dhe periudhë.
Duke folur për nenin 3, ai tha se futja e këtij neni ishte provokim dhe atentat që kërkohej ti bëhej reformës në drejtësi.
“Personat që kanë kryer krime të rënda si trafiku i qenieve njerëzore, vrasje etj, neni nuk parashikonte të kishin ndalim të përhershëm, por me kohëzgjatje të caktuar. Ky ishte ndryshim i papranueshëm për opozitën, ndaj ne kërkuam kohë. Pas kthimit në komision ekspertët e OPDAT thanë se do tërhiqnin mendimin. Më pas vazhdoi me diskutimin e neneve të tjera që kaluan. Neni që ishte propozuar nga ekspertët 6/1 bënte nul atë nen që ishte miratuar pak muaj më parë për ndalimin përjetë të atyre personave që kanë kryer krime të rënda”, u shpreh Halimi.
Ai deklaroi se kush nuk është dakord me ligjin për dekriminalizimin, duhet ti drejtohet Gjykatës Kushtetuese, por nënvizoi se ligji dhe paketa nuk preket. /tesheshi.com/
