Në Mitrovicën e veriut nisi rrënimi i murit të paligjshëm serb, ndërtuar nga zyrtarët lokalë. Në praninë e forcave të shumta policore, dy ekskavatorë të një kompanie ndërtimi rrënuan murin afër lumit Ibër.
Procesi i prishjes së ndërtimit, u ndoq nga afër nga shumë qytetarë, por situata ka mbetur e qetë, ndërsa mediat lokale dhe ato ndërkombëtare kanë pasur në terren ekipet e tyre.
Në momentin e prishjes së murit, reagoi edhe shefja e zyrës së Bashkimit Evropian në Kosovë, Natalya Apostolova. “Kjo gjë tregon se të dy palët mund të arrijnë marrëveshje kur ka dëshirë politike”, u shpreh ajo.
Pritet që pas prishjes së murit, të ketë edhe një deklaratë nga zyra e kryeministrit Isa Mustafa.
Heqja e murit u mundësua pas një marrëveshjeje të arritur të shtunën herët në mëngjes ndërmjet autoriteteve qeveritare në Prishtinë dhe kryetarit të komunës së Mitrovicës së veriut, që parashihte rrënimin e murit të ndërtuar në afërsi të urës qendrore në Ibër. /tesheshi.com/
