Një anije me flamur panamez, Lady Leyla, e ka lënë dje pasdite portin turk të Mersinit, e ngarkuar me 11.000 tonë ndihma për palestinezët e Gazës. Ngarkesa pritet të mbërrrijë këtë mbrëmje në portin izraelit të Ashdodit, për t’u dërguar më pas menjëherë në Gaza.
Veç mijëra tonëve me miell, sheqer, oriz e vaj, e 10.000 pakove me ushqime, në Gaza po dërgohen sasi të mëdha veshjesh, këpucësh e lodrash për fëmijët palestinezë.
Dërgimi i kësaj ngarkese me ndihma për në Gaza u mundësua falë marrëveshjes në fillim të kësaj jave mes Turqisë dhe Izraelit, që i dha fund ngrirjes gjashtëvjeçare të marrëdhënieve midis dy vendeve. Kjo marrëveshje parashikon dhe lejimin e dërgimit të ndihmave e furnizimeve për Gazën.
Nisja e anijes u parapri nga një ceremoni, ku ishin të pranishëm një sërë zyrtarësh të lartë turq. “Mallrat në këtë anije janë dhuratë nga populli turk për vëllezërit dhe motrat në Gaza përpara ardhjes së Bajramit,” deklaroi ministri i Zhvillimit, Lutfi Elvan.
Ndërsa zëvendëskryeministri turk, Vejsi Kajnak, e vuri theksin te ndihma që do t’u jepet palestinezëve në shumë fusha, e te projektet që pritet të marrin udhë apo të përfundojnë, siç është spitali palestinez që do të nisë së shpejti së funksionuari.
“Shpresojmë që dhimbjet dhe lotët në Palestinë të marrin shpejt fund,” qe urimi i prefektit të Mersinit. /tesheshi.com/
