Sam Allardyce vazhdon të jetë në telashe edhe pasi nuk është më trajner i kombëtares së Anglisë. I tërhequr nga detyra pas vetëm 67 ditësh, ai mund të humbasë mundësinë dhe për të drejtuar një ekip tjetër në të ardhmen.
Shefi ekzekutiv i FA-së, federatës angleze të futbollit, Martin Glenn, ka paralajmëruar se Allardyce mund të dënohet me lënie jashtë futbollit.
Siç informon BBC-ja, federata angleze po pret zbardhjen e plotë të raportimit të Daily Telegraph-it për të vendosur mbi masat e mëtejshme. Glenn deklaron se dënimi mund të jetë nga një gjobë e gjer në një përjashtim nga futbolli.
“E kemi trajtuar Sam-in si një të punësuar,” është shprehur shefi ekzekutiv i federatës, i cili nuk e ka përjashtuar gjithashtu një padi ndaj ish-teknikut të përfaqësueses.
Allardyce u detyrua ta lërë detyrën ditë më parë pasi u zbulua se ai kishte dhënë këshilla se si mund të shmangeshin rregullat e transferimit të lojtarëve. Hulumtimi zbuloi gjithashtu dhe një fjalor të pahijshëm të përdorur prej tij karshi kolegëve. /tesheshi.com/
