I nominuari për kryeministër nga koalicioni LDK-AKR-Alternativa, Avdullah Hoti, për herë të parë pas zgjedhjeve ka shprehur ambiciet për të krijuar qeverinë, pas Haradinajt e Kurtit.
Ai thotë se LDK dhe aleatët do ta respektojnë të drejtën e koalicionit PDK-AAK-Nisma për të provuar krijimin e qeverisë dhe se nuk do të krijojnë bllokadë, por bën të ditur se nëse PAN dështon, koalicioni i tyre do ta shfrytëzojë të drejtën e tij për të krijuar qeverinë, por pa treguar se me kë synojnë të lidhin koalicion qeverisës.
“Nëse nuk kanë sukses, koalicion jonë do të shfrytëzojë të drejtën kushtetuese për t’i ofruar vendit një qeveri pro-evropiane dhe profesionale, që do të zbatojë programin që ju kemi ofruar qytetarëve të vendit gjatë fushatës zgjedhore”, ka shkruar Hoti në Facebook.
Kujtojmë se kreu i LDK-së Isa Mustafa ditë më parë tha se partia e tij do të qëndrojë në opozitë nëse nuk i jepet posti i kryeministrit nga partitë e mundshme të koalicionit.
Ndërsa Vetëvendosje ju përgjigj se në asnjë rrethanë nuk pranojnë kushte nga LDK për bashkëqeverisje duke thënë se qytetarët e kanë zgjedhur Kurtin për kryeministër, duke aluduar në rezultatet e 11 qershorit ku VV si parti e vetme ka dalë e para në zgjedhje. /tesheshi.com/
