Edi Rama pas kthimit nga Berlini i ka kërkuar Ilir Metës që të bashkëqeverisë me të deri në fund të mandatit, duke mos u larguar në dhjetor, kur pritet të mblidhet Konventa e LSI-së.
Duke shfrytëzuar ardhjen nga Berlini, ku ka marrë carta biancha nga ana e kancelares Angela Merkel, Rama ka ndërhyrë në politikë duke i hequr Berishës dhe Bashës mundësinë e ndihmës nga Meta.
Me një “shantazh të bardhë” Rama falënderoi Metën edhe Idrizin, por i është drejtuar PD-së, duke e sulmuar fuqishëm, pasi sipas kryeministrit nuk e shihte të arsyeshme që të mund të bashkëpunonte me një parti që e ka penguar që në ditën e parë.
“Dje kremtuam festën kombëtare në krah të zonjës Merkel, një mike e shtrenjtë e Shqipërisë.
Emocion i madh që në praninë time kancelarja uroi për flamurin kombëtar. Emocionuese të merrja mbështetjen e pakursyer të Gjermanisë mike për Shqipërinë.
Unë jam i bindur se do të marrin mbështetjen e Gjermanisë.
Përgëzimet i ndaj me Ilir Metën, pa të cilin reformat nuk do të ishin të mundura. Ndaj edhe me aleatin tjetër, por jo me opozitën, pasi nuk mund të rri e të bëj sikur nuk e shoh atë që PD ka bërë e po bën për ta rrënuar imazhin e Shqipërisë në sytë e veshët e ndërkombëtarëve, për ta bllokuar vendin tonë në rrugën e negociatave për të bindur ata që ky vend është Kolumbi dhe qeveria është strofkull kriminelësh.
Nuk i ndaj dot përgëzimet e kancelares me PD, pasi është fare e qartë se opozita jonë i ka ngritur Shqipërisë një mur që pengon hapjen e negociatave, sepse ka ndaluar zbatimin e ligjit të vettingut.
Nuk ka negociata me BE pa zbatimin e ligjit të vettingut, prandaj dua tu bëj thirrje anëtarëve dhe votuesve të PD-së që të ushtrojnë presion mbi lidershipin dhe ata deputetë të PD-së që janë pjesë e ngritjes së murit. Kjo nuk është kundër nesh por kundër të gjithëve”, tha Rama.
Ai shtoi më tej se për vettingun, Shqipëria duhet të jetë e bashkuar “të gjithë gegë, toskë dhe çam, pa dallim feje, krahine e ideje. Nëse një grusht njerëzisht nuk duan t’i bashkohen Shqipërisë, kjo është detyrim patrioti për të gjithë, deputetë apo anëtarë të PD që nuk i frikësohen një drejtësie të re”.
Rama nuk e ka vënë në dyshim që negociatat me BE-në do të hapen brenda këtij mandati qeverisës.
Ndërkaq, kreu i Kuvendit Ilir Meta tha se “vendi më i integruar në Europën e Bashkuar, në themel të të cilit qëndrojnë vlerat antifashiste.
Rekomandimi pozitiv është tregues i progresit jam i bindur se e plotësojmë edhe më tej idealin e tyre”./tesheshi.com/
