Pas vendimit për protestë masive më 7 maj në Kavajë, pikërisht ditën e zgjedhjeve të pjesshme lokale për kreun e ri të bashkisë së këtij qyteti, PD po planifikon dhe organizimin e një tjetër proteste në Tiranë. Kjo është diskutuar së fundi në një takim mes kreut të selisë blu, Basha me vartësit e tij në rrethe.
Kujtojmë se PD e nisi hapjen e çadrës me një protestë masive por që nuk e shoqëroi më me ndonjë të ngjashme përgjatë dy muajve, sa çadra vijon të jetë e ngritur dhe ku gjithçka konsumohet brenda saj.
Megjithatë, nga burime të brendshme thuhet se vendimi final për një protestë tjetër kryeqytetase ende nuk është marrë, pasi gjithçka do varet nga vizita në fillim të javës së ardhshme e nr. 2 të PPE-së në Tiranë, Mcallister. Zyrtari i lartë i së djathtës europiane do vjen me një plan konkret për zgjidhjen e krizës, më saktë daljen e opozitës nga çadra.
Pra, deri më tani, në fuqi qëndron vetëm protesta e Kavajës, për të cilën PD po mobilizohet maksimalisht, pasi këtë qytet e ka sfidë të rëndësishme politike, duke qenë dhe një bastion i humbur i saj. /tesheshi.com/
