Një dokumentar në TCH nga Marin Mema, e për pasojë një thyerje monumenti, është bërë shkak për një hapjen e një vatre të re fërkimesh me elementin minoritar në Shqipëri.
Gazetari Mema i ka kushtuar një material special figurës së Thimjo Lolit, të cilin minoriteti e konsideron hero dhe i ka ngritur një bust në fshatin Krane të Bashkisë Finiq, ndërsa sipas versionit shqiptar ai ka qenë një vrasës çamësh. Kjo ka bërë që busti i tij të dëmtohet fill pas dokumentarit. Kjo ka çuar në reagimin e OMONIA-s, që e ka konsideruar si akt të rëndë anti-helenik.
“Nga çdo pikëpamje është i dënueshëm akti i ‘personave të panjohur’ që dje, herët pasdite (e Hënë, 3 Dhjetor 2018) të nxitur nga motive raciste dhe antihelenike, në sheshin qendror të fshatit Krane, me dhunë hoqën dhe në vijim shkatërruan pllakën e mermertë me portretin e luftëtarit të Minoritetit Etnik Grek, Thimjo Loli.
Minoriteti Etnik Grek ka të drejtë të pamohueshme dhe të sanksionuar të nderojë historinë e tij dhe heronjtë që ka nxjerrë në praninë dhe ecurinë e tij diakronike në territoret amtare. Autoritetet lokale dhe Këshilli Bashkiak i zonës e ka për detyrë jo thjesht të këmbëngulë në dënimin e aktit të shkatërrimit të memorialit gjë që mund të kishte sjellë pasoja akoma më të rënda nëse autorët do të kishin rënë në duart e banorëve të fshatit, por edhe të ndërmarrë menjëherë veprimet e nevojshme të rehabilitimit të zëvendësimit të pllakës së dëmtuar dhe me sanksionim të qartë ligjor”, thuhet në deklaratë.
Deri më tani nuk ka ndonjë të dhënë nga policia se kush mund ta ketë kryer aktin. Ngjarja pason atë të Bularatit, ku vrasja e Kostandinos Kacifasit pas një “lufte” me policinë shqiptare, e shndërroi këtë të fundit në hero për elementin nacionalist grek. /tesheshi.com/
