Pas marrjes së disa jetëve në Itali, orteku i borës është paraqitur edhe në Kosovë, ku i ka marrë jetën një të riu 24-vjeçar nga Ferizaji.
Ngjarja e rëndë ka ndodhur në qendrën e skijimit në Brezovicë, pasditen e së enjtes, ku i ndjeri ka qenë duke skijuar jashtë shtigjeve të skijimit, konkretisht në një shteg që është i pjerrët dhe i rrezikshëm i njohur si “Shtegu i Shqiponjave”.
Policia në Ferizaj ka konfirmuar ngjarjen derisa vdekjen e të riut e ka konstatuar edhe mjekët.
Në momentin e ortekut, afër viktimës kanë qenë edhe persona të tjerë, mirëpo që kanë shpëtuar. Trupi i viktimës pa shenja jete është nxjerrë nga bora nga shokët e tij.
Ky është viktima e parë që humb jetën në Brezovicë në rrethana të tilla, që nga viti 1981. Atë botë, një ortek i kishte zënë disa njerëz që qëndronin në një parking të kësaj qendre skijimi. /tesheshi.com/
