Shtetet e Bashkuara të Amerikës i kanë dërguar një mesazh të fortë Beogradit pas deklaratave të ashpra që pasuan pranimin e Kosovës në UEFA dhe liberalizimin e vizave me vendet e BE-së.
Siç bën të ditur televizioni serb B92, ambasadori i SHBA-së në Beograd, Kyle Scott, i ka dorëzuar kryeministrit serb, Aleksandër Vuçiq, një mesazh zyrtar nga sekretari amerikan i Shtetit, John Kerry.
Në mesazh, Kerry i kërkon qeverisë së re të Beogradit që do të dalë nga parlamenti i ri i sapozgjedhur të vazhdojë normalizimin e marrëdhënieve me Kosovën dhe fqinjët.
Me një gjuhë diplomatike, Kerry i kujton kreut të Beogradit që duhet të mbajë angazhimet e dhëna si kusht për mbështetjen e fortë që Uashingtoni dhe Brukseli i kanë dhënë Vuçiqit për të fituar zgjedhjet parlamentare. I gjithë investimi perëndimor ishte që të largonin nga qeveria serbe grupime të fuqishme që rrjedhin nga koha e Millosheviqit, siç është Partia Socialiste e Iviça Daçiqit.
Partia e Vuçiqit ka fituar më shumë se gjysmën e vendeve në parlament, me një koalicion ku bën pjesë një parti e vogël e Vojvodinës. Me ç’rast kreu i Partisë Progresive nuk do të ketë nevojë për Daçiqin.
Por pas mesazhit të John Kerry-t, ka mbërritur sulmi i kreut të radikalëve. “I pafajshmi” i Hagës, Vojislav Sheshel, i cili edhe pse ka marrë një rezultat të papritur dhe me 22 deputetë ka hyrë në parlament, i konsideron rezultatet e zgjedhjeve si të falsifikuara.
Siç bën të ditur B92-shi, kryeministri serb, Aleksandër Vuçiq, deklaroi në takimin me ambasadorin amerikan se Beogradi do të vazhdojë politikën e qeverisë së shkuar për normalizimin e marrëdhënieve me Kosovën dhe fqinjët e tjerë.
Por në drejtim të kundërt me qëndrimin e shefit të tij, kreu i Zyrës për Kosovën në qeverinë e Serbisë, Marko Gjuriq, deklaroi për televizionin publik serb RTS se Beogradi nuk e njeh vendimin e Gjykatës Kushtetuese të Kosovës në lidhje me “Zajednicën”. “Serbia nuk e pranon ndryshimin e njëanshëm të marrëveshjeve të arritura.”
Zyrtari i lartë i Beogradit ka deklaruar se “kohët e fundit ka pasur ‘dekorata dhe medalje’ të shumta të ndërkombëtarëve për Kosovën, siç është pranimi në UEFA dhe liberalizimi i i vizave, por askush nuk po e përmend më Zajednicën.”
Gjuriq shtoi se nuk ka normalizim të marrëdhënieve pa instalimin e Asocacionit të Komunave Serbe në Kosovë.
Gjuriq ka sulmuar fort grekun Dimitris Avramopulos, komisioneri i BE-së për Migrim dhe Punë të Brendshme, i cili deklaroi se të gjithë qytetarët e Kosovës duhet të pajisen me pasaporta biometrike, përfshirë edhe serbët.
Kjo gjë i nxjerr jashtë loje dokumentet e identifikimit që Beogradi u ka dhënë serbëve të Kosovës, të cilat nuk janë të përfshira në sistemin Tims. /tesheshi.com/
