Ashtu siç pritet edhe siç e paralajmëruam dy ditë më parë në një shkrimin mbi vizitën e Ditmir Bushatit në Teheran, Tirana zyrtare ka nisur tratativat e shpejta dhe të forta për t’u afruar me Moskën e Vladimir Putinit.
Pas vizitës së Mirela Kumbaros në kryeqytetin rus, së shpejti riaktivizohet pas shumë vitesh Komisioni i përbashkët Ekonomik mes dy vendeve.
Në Tiranë pritet të mbërrijnë një grup i madh qeveritarësh rusë, të cilët do të lidhin një marrëveshje që po bëhen gati nga kanalet diplomatike të të dy palëve.
Duket se Edi Rama, i cili prej kohësh ka një marrëdhënie të ngushtë me Ankaranë e Erdoganit, po ndjek një politikë të ngjashme me Turqinë, normalisht për t’u përshtatur me botën e ndryshuar përgjithmonë tashmë, nga fitorja e Donald Trump në SHBA.
Gjërat janë ende në hapat e para, por këto hapa duket se po hidhen me vrik dhe pa ndroje nga administrata e Edi Ramës, që siç duket po përgatitet për një Europë më indiferente ndaj Ballkanit, si pasojë edhe problemeve të brendshme dhe shpërthimit kudo të grupimeve ultranacionaliste.
Vetë Edi Rama ka shtrënguar duart me ambasadorin rus në Tiranë, me të cilin është rënë dakort për të intensifikuar marrëdhëniet.
Ky afrim me Moskën nuk parasheh një largim nga NATO apo nga angazhimi perëndimor i Shqipërisë si anëtar i Aleancës së Atlantikut të Veriut, por një manovër politike që parasheh një rigjallërim të marrëdhënieve ekonomike e tregtare të vendit më të madh eksportues të gazit në Europës siç është Rusia, e cila synon të ndërtojë një rrjet të madh gazsjellësish.
Më i madhi ndër to, Rryma Turke pritet të ketë daljen e tij në Shqipëri, për të arritur më pas Italinë.
Një referendum në Itali, kryesisht në rajonin e Puglias ka shkaktuar probleme për TAP, i cili është i rrezikuar seriozisht.
Siç mësoshet nga qeveria shqiptare, javën e ardhshme pritet të mblidhet sesioni i i radhës i Komisionit Ndërqeveritar Rusi-Shqipëri për Tregtinë, Bashkëpunimin Ekonomik dhe Tekniko-Shkencor, duke shënuar kështu edhe takimin parë që nga viti 2009.
Zv.ministrja e Zhvillimit Ekonomik, Turizmit, Tregtisë dhe Sipërmarrjes së Shqipërisë, Adela Karapici është takuar me ambasadorin e Rusisë në Tiranë, Aleksandër Karpushin pikërisht për të koordinuar këtë eveniment.
Siç bëhet e ditur në një publikim në rrjetin social facebook të ambasadës ruse, si hap i parë në këtë rrugëtim, bëhet e ditur se u ra dakord paraprakisht për organizimin e një takimi të bashkëkryetarëve të Komisionit, znj. Karapici dhe homologut të saj, zëvendësministri i Parë i Drejtësisë së Rusisë, Sergej Gerasimov, për të diskutuar hollësisht mbi axhendën e mbledhjes së ardhshme.
Në njoftim thuhet se “Bashkëbiseduesit, ndanë bindjen se marrëdhëniet ekonomiko-tregtare Rusi-Shqipëri duhet rigjallëruar dhe çuar në një nivel më të lartë cilësor të bashkëpunimit pragmatik, me përfitim reciprok dhe në interes të qytetarëve të dy vendeve”. /tesheshi.com/
