Pas humbjes së zgjedhjeve të 21 qershorit, kandidatja e djathtë për qytetin e Durrësit ka deklaruar në një dalje për mediat se kjo nuk është humbja e asgjëje, por nisja e një beteje të madhe.
“Është fillimi i një beteje të madhe, nuk është humbja e asgjëje. Kam besim se njerëzit që kanë ideal në vlera janë me mua”,- tha kandidatja Grida Duma.
Ajo deklaroi në nisje të fjalës së saj se nuk e mendoi se ishte një garë për të marrë pushtetin e qytetit të Durrësit, por për të çliruar qytetin. Sipas Dumës, dhjetëra biznese jetonin në ankthin dhe presionin e të mos jetuarit në një standard lirie.
Ajo e komentoi kundërshtarin e saj politik në këtë garë, Vangjush Dako, jo si një intelektual që do të punojë për interesat e qytetarëve, por si një shërbyes interesash të vogla.
“Kishte me vete makinerinë e plotë të një infrastrukture, e cila tentoi të manipulonte vërtetësinë e votës. E njoh humbjen si realitet, por realiteti dhe e vërteta vijnë si pasojë e disa presioneve dhe akteve që vijnë si pasojë e qindra mijëra mesazheve që unë marr. I them kujtdo që beson në vlerat e punës, të dinjitetit, për të çliruar një qytet e për t’ia kthyer atë qytetarisë, për ata që besojnë tek meritokracia, se jam me ata dhe do të përballojmë bashkë çdo sfidë”,- u shpreh Grida Duma. /tesheshi.com/
