Këtë të enjte, 24 orë pas takimit me “mikun politik” Nikola Gruevski, kreu BDI-së Ali Ahmeti është takuar me atë të LSDM-së, Zoran Zaev.
Ky është takimi i parë në nivel liderësh mes tyre pas zgjedhjeve të parakohshme të 11 dhjetorit.
Në takim, ashtu siç thonë ng BDI, në parim u diskutua për qëndrimet respektive që palët i kanë prezantuar në këtë periudhë, pa hyrë në detaje ose biseda për çështje të veçanta konkrete.
Në periudhën në vijim, sipas sqarimit që jepet nga partia e Ali Ahmetit, është e pritshme që takime të tilla të ketë midis dy palëve dhe opinioni do të njoftohet me kohë.
Ndërkohë kujtojmë se nga afati kushtetues për krijimin e qeverisë së re kanë mbetur edhe pak ditë. Mandatin për ta formuar e ka Gruevski në dorë, por 20-ditëshit po i vjen fundi. Kushtetuta e detyron më pas liderin e VMRO-së që t’ja kalojë mandatin rivalit të tij, Zaevit, gjë që kurrë nuk do ta dëshironte.
Ai po përpëlitet në përpjekje për të nënshtruar ndonjë prej partive shqiptare, të cilat kanë vënë kushte që Gruevski assesi nuk i pranon, por siç duket Pakti Rama mes kokave të politikës shqiptare në Maqedoni, nënshkruar në zyrën e tij, paska shumë besa-besë brenda. /tesheshi.com/
